नाशिक : दुसऱ्याच्या नावे असलेल्या शेत जमिनीचे बनावट दस्तऐवज तयार करून ही जमीन परस्पर विक्री करण्याचा प्रयत्न झाल्याचा प्रकार समोर आला आहे. न्यायालयाच्या आदेशान्वये बनावट दस्तऐवज नोटरी (Notary) करणाऱ्या वकिलांसह सहा जणांविरुद्ध देवळाली कॅम्प (Deolali Camp) पोलिस ठाण्यात गुन्हा दाखल करण्यात आला आहे. यातील संशयित ॲड ए. आय. शेख या वकीलावर दाखल झालेला हा दुसरा गुन्हा आहे.

नाजीम अब्दूल मजीद शेख, तब्बसुम इरफान शेख, अब्दूल मजीद शेख (रा. संसरी नाका, देवळाली कॅम्प), रमेश जाधव, तुकाराम मोरे व अ‍ॅड. ए. आय. शेख (रा. नाशिक रोड), अशी संशयितांची नावे आहेत. याप्रकरणी मुंबईस्थित इरफान अब्दुलगनी शेख (मुळ रा. देवळाली कॅम्प) यांनी तक्रार दाखल केली आहे. इरफान शेख यांच्या मालकीची मौजे लहवित येथील सर्व्हे नं १४८ /१/२ मध्ये शेत जमीन आहे. या मिळकतीचे संशयितांनी कट रचून परस्पर विक्री करण्याच्या इराद्याने बनावट दस्तऐवज (Fake Documents) तयार केले. या दस्तऐवजावर अ‍ॅड. ए. आय. शेख यांनी नोटरी केल्याचे म्हटले आहे. याबाबत इरफान शेख यांनी पोलिसांचे उंबरठे झिजविले, मात्र न्याय न मिळाल्याने त्यांनी कोर्टात धाव घेतली होती. न्यायालयाने संबंधितांवर गुन्हा दाखल करण्याचे आदेश दिले असून, उपनगर (Upanagar) पोलिस ठाण्यात फसवणुकीसह विविध कलमान्वये (IPC section) गुन्हा दाखल करण्यात आला आहे. अधिक तपास सहाय्यक निरीक्षक गिते करीत आहेत.