Nashik Crime : राज्यात गुटख्यावर बंदी असताना सुद्धा शासनाचे आदेश डावलून बनावट गुटखा नाशिक रोड परिसरातील एकलहरे येथे बनविला जात होता.

सदर बनावट कारखाना नाशिक रोड पोलिसांनी उद्‌ध्वस्त केला असून, लाखो रुपयांचा माल जप्त केला आहे. (Fake gutka factory destroyed by police nashik crime news)

नाशिक रोड पोलिस स्टेशनचे सहाय्यक निरीक्षक गणेश शेळके यांना एकलहरे औष्णिक विद्युत केंद्रालगत सामनगावात मातृछाया फार्म हाऊसच्या समोर एका जुन्या घरात बनावट गुटखा बनविला जात असल्याची माहिती मिळाली.

त्यानंतर वरिष्ठ पोलिस निरीक्षक देविदास वांजळे यांच्या मार्गदर्शनाखाली सहाय्यक निरीक्षक शेळके, पुंडलिक टेपने, संतोष पिंगळ, पोपट पवार, अविनाश हांडे, बाळकृष्ण सोनवणे, ताजकुमार लोणारी आदींनी छापा टाकून लाखो रुपयाचा बनावट माल जप्त केला.

हेही वाचा : Credit Card फसवणूक....काय घ्याल काळजी?

गुटखा बनविण्याचे मशिन तसेच केमिकल विविध कंपन्यांच्या नाव असलेले लेबल, गुटखा बनविण्यासाठी लागणारा बनावट कच्चा माल जप्त करण्यात आला आहे. कामगिरीबद्दल नाशिक रोड पोलिसांचे सर्वत्र अभिनंदन करण्यात येत आहे.

याप्रकरणी दिनेश बाबूलाल कुमार (रा. कानपूर), नीलेश दिनेश इंगळे (रा. सिन्नर फाटा, नाशिक रोड), दीपक मधुकर चव्हाण (रा. अंबड) यांना अटक करण्यात आली आहे.