वणी : ता. माळेदुमाळा, ता. दिंडोरी येथे घरास आग लागल्याने संसारोपयोगी साहित्य व धान्याचे पोते जळाल्याने मोठे आर्थिक नुकसान झाल्याची घटना घडली आहे. (fire broke out at Maledumala causing damage to food and materials Nashik)

माळेदुमाला, ता. दिंडोरी येथील प्रगतशील शेेेेेतकरी प्रशांत दगू वाघ, गणेश दगू वाघ, नामदेव बाळकृष्ण वाघ यांच्या रहात्या घराला शनिवार, ता. १६ दुपारी १२ वाजेच्या सुमारा शॉर्टसर्किटमुळे घराला आग लागली.

सुमारे शंभर वर्षांपूर्वीचे लाकडी पाटायीचे व माडीचे घर असल्याने आगीने रुद्ररुप धारण केले. आग लागल्याचे कळताच घरातील सदस्यांनी घराबाहेर धाव घेतली.

आगीचे घटनेची माहिती गावात जाताच गावातील तरुण ग्रामस्थांनी बादल्यांनी तसेच फवारणीची ट्रॅक्टरमध्ये पाणी भरुन आणून आग विझविण्याचे शर्थीचे प्रयत्न केले. तर काहींनी घरातील साहित्य सुरक्षित स्थळी हलविण्यास मदत केली.

ग्रामस्थांनी याबाबत वणी पोलिस ठाणे तसेच दिंडोरी नगरपरिषदेच्या अग्निशामक दलासही याबाबत माहीती दिली.

दरम्यान अग्निशमक दलाचे वाहन घटनास्थळापर्यंत दाखल होईपर्यंत ग्रामस्थांनी लागलेली आग आटोक्यात आणली होती, त्यानंतर अग्निशमक दलाने व्यवस्थित पाणी मारुन संपूर्ण आग विझवली.

या आगीत घराचे तसेच घरातील साहित्यासह साठवून ठेवलेल्या सोयाबीन व अन्य धान्याच्या पोत्यांचे मोठे नुकसान झाले आहे. याबाबत पोलिस प्रशासनासह तलाठी, ग्रामसेवक यांनी घटनास्थळी भेट देवून प्राथमिक पंचनामा केला आहे.