दिंडोरी (जि. नाशिक) : तालुक्यात परतीच्या पावसाने शेवटच्या टप्प्यात ढगफुटीसारखा पाऊस पडल्याने पालखेड, वाघाड, करंजवण, पुणेगाव, तिसगाव, पालखेड या सहापैकी पाच धरणे भरल्याने पाणीप्रश्न सुटण्यास मदत झाली आहे. याचा फायदा दिंडोरी, येवला, निफाड तर काही प्रमाणात कोपरगाव तालुक्यात उपयोग होणार आहे.

पावसाळ्यातील जून ते आॅगस्ट महिन्यात फारसा पाऊस झालाच नाही, त्यामुळे तालुक्यावर दुष्काळाचे सावट होते. पालखेड धरण वगळता इतर धरणात फारसा साठा नव्हता. सप्टेंबरच्या शेवटच्या टप्प्यात परतीच्या पावसाने जोरदार हजेरी लावल्याने धरणे भरली आहेत.
करंजवण धरण ९८ टक्के भरले असून सध्या पाऊस थांबला असला तरी अजून साठ्यात वाढ होत आहे. गतवर्षी हे धरण फक्त ९२ टक्के भरले होते. वाघाड धरण शंभर टक्के भरले आहे. या धरणावर तालुक्यातील बहुतांश भाग अवलंबून आहे. पालखेड धरणातील पाण्याचा फायदा मोहाडी व खडकसुकेणे, लोखंडेवाडी, जोपूळ, चिंचखेड आदी गावांना होतो. इतर सर्व पाणी निफाड येवला तालुक्यांना जाते. पुणेगाव धरण शंभर टक्के भरले आहे. तिसगाव धरणही पूर्ण क्षमतेने भरले आहे. ओझरखेड धरणातही तब्बल ८८.१७ टक्के साठा आहे. दरम्यान या धरणातील पाण्याचे संबंधित विभागाने काळजीपूर्वक नियोजन केले तर पाणीटंचाई निर्माण होणार नाही.