सिडको : पत्नीच्या अनैतिक संबंधामुळे मानसिक तणावात येत पतीने नदीत उडी मारून आत्महत्या केल्याप्रकरणी पत्नीसह तिच्या प्रियकरावर अंबड पोलिस ठाण्यात गुन्हा दाखल करण्यात आला आहे. दोघांना अटक करण्यात आली आहे.

पोलिसांनी दिलेल्या माहितीनुसार राकेश उर्फ राधेशाम टिकमदास वैष्णव-बैरागी (३४, रा. माऊली लॉन्स नवीन नाशिक) हे मंगळवारी (ता.२०) घरातून बेपत्ता झाले होते. याप्रकरणी अंबड पोलिस ठाण्यात तक्रार करण्यात आली होती. गुरूवारी (ता.२२) एक मृतदेह बापू पुलानजीक तरंगताना बोटिंगला आलेले अंबादास तांबे यांनी बघितला होता. (Husband suicide case Wife arrested with boyfriend Nashik Crime News)

हेही वाचा : प्रेमाला धर्म आहे...?

त्यांनी याबाबत तात्काळ गंगापूर पोलिसांना माहिती दिली. तो मृतदेह राकेशचा असल्याची पोलिसांना खात्री झाली. राकेशच्या नातेवाईकांनी त्यांची आत्महत्या नसून हत्या असल्याचा आरोप केला. मात्र अंबड पोलिस ठाण्याचे वरिष्ठ निरीक्षक भगिरथ देशमुख यांनी या घटनेत तपासानंतर काही तथ्य आढळ्यास खुनाचा गुन्हा दाखल करण्यात येईल असे आश्वासन नातेवाईकांना दिले होते.

याप्रकरणी अंबड पोलिस ठाण्यात राकेश यांची तीस वर्षीय पत्नी व तिचा प्रियकर रिझवान मन्सुरी (२५, रा. बजरंगवाडी ) यांच्यांतील अनैतिक संबंधामुळे मानसिक तणावात आल्याने राकेश यांना आत्महत्येस प्रवृत्त केल्याप्रकरणी गुन्हा दाखल करण्यात आला. सहाय्यक पोलिस निरीक्षक वसंत खतेले तपास करीत आहेत.