मालेगाव : शहरातील डीके काॅर्नर भागातील दाम्पत्याने आत्महत्या केल्याने खळबळ उडाली आहे. मंगळवारी (ता. १०) रात्री हा प्रकार घडला. पंकज दिगंबर बिरारी (४०) व रेणुका पंकज बिरारी (३५, रा. डी. के. काॅर्नर) असे दाम्पत्याचे नाव आहे.

घटना घडली त्यावेळी घरात कोणी नसल्याने उशिरा हा प्रकार लक्षात आला. पंकज भाजपा चा धडाडीचा कार्यकर्ता होता. या दाम्पत्याच्या आत्महत्येचे कारण समजू शकले नाही. तथापि कर्जाला कंटाळून व कर्जदार खासगी कंपनीने तगादा लावल्याने त्यांनी आत्महत्या केल्याची परिसरातील नागरिकांमध्ये चर्चा आहे. पंकज ने आत्महत्या करण्यापूर्वी चिठ्ठी लिहून ठेवल्याचे बोलले जाते.

घटनेची माहिती मिळताच पोलिस उपअधीक्षक प्रदीपकुमार जाधव, कॅम्प पोलीस ठाण्याचे सहायक पोलिस निरीक्षक प्रकाश काळे सहकाऱ्यांसह तातडीने घटनास्थळी दाखल झाले. पोलिसांनी पंचनामा व माहिती घेण्यास सुरुवात केली आहे. मृतदेह चिकित्सेसाठी सामान्य रुग्णालयात पाठविण्यात आले. कॅम्प पोलीस ठाण्यात नोंद करण्यात आली आहे. रात्री उशिरापर्यंत किंवा उद्या या प्रकरणी गुन्हा दाखल होईल असे पोलिसांनी सांगितले.