Nashik News : जिल्ह्यातील ग्रामपंचायतीना ऑनलाइन कर भरण्यासाठी १५ ऑगस्टपासून क्यूआर कोड सक्तीचा करीत त्याच्या अंमलबजावणीचे निर्देश देण्यात आले होते (Implementation of QR code by 1200 Gram Panchayats nashik news)

‘मेरी मिट्टी- मेरा देश’ या उपक्रमांतर्गत १६ ऑगस्टला क्यूआर कोड प्रणाली राबविण्याचे आदेश होते. त्यास चांगला प्रतिसाद मिळाला असून, जिल्ह्यातील एक हजार ३८८ पैकी तब्बल एक हजार २५० ग्रामपंचायतींनी त्यांची अंमलबजावणी केली आहे.

ग्रामस्थांना घरबसल्या घरपट्टी व पाणीपट्टी यांसारखे विविध कर भरता यावेत, यासाठी ग्रामपंचायतींना क्यूआर कोड सक्तीचा करण्याबाबत केंद्र सरकारच्या पंचायतराज मंत्रालयातर्फे आदेश काढण्यात आले होते.

हेही वाचा : Credit Card फसवणूक....काय घ्याल काळजी?

ग्रामपंचायत विभागाने सर्व गटविकास अधिकाऱ्यांना तसे पत्र काढत कार्यवाहीच्या सूचना केल्या. त्यानुसार १६ ऑगस्टला ही मोहीम राबविण्यात आली. तिचा अहवाल ग्रामपंचायत विभागाला नुकताच प्राप्त झाला.

तालुकानिहाय झालेली करवसुली

बागलाण (१ लाख ९९ हजार ४६२), सिन्नर (९२ हजार १७०), त्र्यंबकेश्वर (८० हजार २०१), दिंडोरी (३ लाख ९२ हजार ७२५), सुरगाणा (१८ हजार ३७९), नाशिक (२ लाख ३६ हजार ७८२), येवला (५६ हजार ७७०), चांदवड (१ लाख ६५ हजार ९५), निफाड (१ लाख ३९ हजार १५२), पेठ (८३ हजार ६८०), इगतपुरी (२ लाख ४८२). कळवण, मालेगाव, देवळा, नांदगाव तालुक्यांची माहिती उपलब्ध झाली नाही.