पिंपळगाव-बसवंत (जि.नाशिक) : पिंपळगांव शहरातील सहा कांदा व्यापाऱ्यांवर आज (ता.२१) आयकर विभागाने छापे टाकले. सकाळी सात वाजताच व्यापाऱ्यांच्या विविध आस्थापना कार्यालय, निवासस्थानावर आयकर विभागाने धाड टाकली. पिंपळगांव शहरात एकच खळबळ उडाली असुन इतर व्यापाऱ्यांचे धाबे दणाणले आहेत. पिंपळगांव शहरात नामांकीत कांदा व्यापाऱ्यावर आयकर विभागाने संक्रांत आणली.

सकाळ पासुन गेल्या वर्षभरातील कांद्यासह जमीन खरेदीचे कागदपत्रे, बॅकेतील व्यवहार यांची कसुन चौकशी सुरू होती. पोलीस बंदोबस्तासह आयकर विभागाच्या सहा पथकाची कारवाई दिवसभर सुरू होती. आयकर विभागाच्या छाप्यामुळे पिंपळगांव बाजार समितीत कांदा लिलावावर काहीसा परिणाम जाणवला. व्यापाऱ्यांनी या कारवाई धसका घेतला आहे. पिंपळगांव शहरातील नागरिकांमध्ये याबाबत चर्चा होती. पिंपळगांव बाजार समिती लगत असलेल्या चिचंखेडच्या भुखंडाची खरेदीचे कनेक्शन मुळे व्यापाऱ्यांवर हे धाडसत्र झाल्याचे बोलले जात आहे.