इंदिरानगर (जि. नाशिक) : शिवाजीवाडी ते थेट पाथर्डी गावापर्यंत असलेल्या वडाळा -पाथर्डी रस्त्यावर केबल आणि इंटरनेट चालकांच्या केबल्सने अतिक्रमण केल्याने वाहतूक समस्या निर्माण झाल्याने याबाबत संबंधित यंत्रणेने लक्ष घालण्याची मागणी नागरिकांनी केली आहे. केबलवाल्यांकडून टीव्ही तसेच इंटरनेटच्या सुविधांसाठी या केबलचा वापर केला जातो. (Indiranagar street lights occupied by cables Nashik News)

सहसा इमारतींच्या टेरेसवर या संबंधित यंत्रणा बसवलेल्या आहेत. तेथून जोडणी देताना मोठ्या लांबीच्या केबलचा वापर केला जातो. त्यासाठी वेळप्रसंगी हा मुख्य रस्तादेखील ओलांडावा लागतो. त्यामुळे रस्त्याच्या दुभाजकात असलेल्या पथदीपांचा उपयोग उपयोग ही मंडळी करते.

मात्र असे करत असताना बहुतांश वेळा कोणतीही खबरदारी न घेतल्याने या केबल खाली लोंबकळतात. त्यामुळे आता ठिकठिकाणी अपघातांच्या मालिका सुरू झाल्या आहेत. मंगळवारी (ता.३१) सायंकाळी विनयनगर भागात दुचाकीवरील महिलेच्या हॅण्डलमध्ये केबल अडकल्याने अपघात झाला.

हेही वाचा : भारतीय क्रिकेटची नवी आशा- पृथ्वी शाॅ

यापूर्वी देखील एका कारचे मोठे नुकसान झाले आहे. परिसरातील युवकांना अनेक वेळा रस्त्यावर पडलेली ही केबल गोळा करून पथदीपाला बांधून ठेवावी लागते. या केबलमुळे शॉर्टसर्किट सारखे प्रकारदेखील होत असून त्यामुळे वीजपुरवठा खंडित होण्याचे प्रमाण वाढले आहे .त्यामुळे संबंधित यंत्रणांनी याबाबत लक्ष घालण्याची मागणी आता नागरिकांनी केली आहे.

"सध्या टीव्ही आणि इंटरनेटच्या वीज खांबावर टाकलेल्या या केबलमुळे वारंवार अपघात होत आहेत. अनेक वेळा संबंधितांना सांगूनदेखील कोणत्याही प्रकारची सुधारणा दिसून येत नाही. संबंधित यंत्रणेने दखल घेण्याची गरज निर्माण झाली आहे."

- प्रवीण जाधव, सामाजिक कार्यकर्ता