Water Supply Stop : जेल रोडला पाणीपुरवठा करणारा जलकुंभ भरण्यासाठी असलेली मुख्य जलवाहिनी मंगळवारी (ता. १३) फुटली. त्यामुळे दोन दिवसांपासून जेल रोडला पाणीच नाही.

अचानक उद्भवलेल्या या परिस्थितीमुळे जेल रोडला लोखंडे मळा, हनुमंतनगर, चैतन्यनगर, रुक्मिणीनगर, सप्तशृंगी नगर, लक्ष्मणनगर सह शेकडो गृहबांधणी योजना आणि सोसायटीमध्ये पाणीच आलेले नाही. (Jail Road without water for 24 hours nashik news)

हेही वाचा : Credit Card फसवणूक....काय घ्याल काळजी?

परिणामी बुधवार (ता. १४) सकाळपासून जेल रोड भागातील नागरिकांना मळे भागातील विहिरी आणि कूपनलिकांवर पाण्यासाठी वणवण करावी लागली. एरवीही विवाह किंवा इतर कार्यक्रमात वापरण्यात येणाऱ्या पाण्याच्या जारला प्रचंड मागणी आली एका दिवसात प्रतिजार दीडशे ते दोनशे रुपये अनामत रकमा घेऊन पाणी विक्री सुरू होती.

दुसऱ्या दिवशी रात्री उशिरापर्यंत दुरुस्तीचे काम सुरूच होते. मनपाच्या अभियंत्यांनी तळ ठोकून दुरुस्तीच्या कामाला गती देण्याचा प्रयत्न चालविला होता. दरम्यान, दोन दिवसांपासून उपनगरांमध्ये थेंबभरही पाणी न आलेल्या या भागात साधा टँकरही महापालिकेकडून पाठविण्यात आला नाही.