येवला (जि. नाशिक) : भारतीय सैन्यदलात हवालदार या पदावर असलेले येथील संदीप अर्जुनराव शिंदे (Jawan Sandeep Shinde)यांना कर्तव्यावर असताना वीरमरण आले. येथे आज शासकीय इतमामात मानवंदना देऊन अंत्यसंस्कार करण्यात आले.

त्यांच्या निधनाचे वृत्त समजताच तालुक्यात दोन दिवसांपासून शोककळा पसरली होती. दिवंगत जवान संदीप शिंदे यांच्यामागे आई, वडील, पत्नी व दोन मुले आणि एक बहिण असा परिवार आहे. वीर जवान शिंदे यांचे पार्थिव आज (ता.१५) त्यांचे मूळ गाव असलेल्या येवला शहरात विठ्ठलनगर येथे आणण्यात आले. त्यांच्या अंत्यदर्शनासाठी डोळ्यात अश्रूरुपी श्रद्धांजली वाहत प्रचंड जनसमुदाय उपस्थित होता. शहर पोलिसांतर्फे चोख बंदोबस्त ठेवण्यात आला होता.
दरम्यान सजवलेल्या रथातून शिंदे त्यांची अंत्ययात्रा घरापासून अमरधाम येथे आणण्यात आली. यावेळी भारत माता की जय, अमर रहे अमर रहे, संदीप शिंदे अमर रहे अशा घोषणांनी त्यांना अंतिम निरोप दिला.

जवान शिंदे यांचा अंत्यविधी शासकीय इतमामात पार पडला. याप्रसंगी तहसीलदार प्रमोद हिले उपस्थित होते. यानंतर नाशिक ग्रामीण पोलिस दल व शहर पोलिसांतर्फे त्यांना मानवंदना देण्यात आली. पालकमंत्री छगन भुजबळ यांचे स्वीय सहाय्यक बाळासाहेब लोखंडे, नगराध्यक्ष बंडू क्षीरसागर, माजी नगराध्यक्ष रामदास दराडे, ज्येष्ठ नेते माणिकराव शिंदे आदींनी आदरांजली.