येवला : राज्य शासनानं महिलांसाठी आणलेल्या लाडकी बहीण योजनेचा लाभ घेण्यासाठी सध्या राज्यभरातील तहसील कार्यालये आणि सेतू केंद्रांवर मोठी झुंबड उडालेली पहायला मिळत आहे. पण याच दरम्यान एक दुःखद घटना नाशिकच्या येवल्यात घडली आहे. लाडकी बहीण योजनेची कागदपत्रे जमा करण्यासाठी जाताना एका महिलेला वाहनाच्या धडकेत मृत्यू झाला आहे. त्यामुळं हळहळ व्यक्त केली जात आहे. (Ladki Bahin Yojna Nashik Yeola women death in accident while going to submit scheme documents)

उज्वला चौधरी (रा. रेल्वे स्टेशन, येवला) या महिलेला तहसील कार्यालयाच्या गेटवर नगर-मनमाड महामार्गावर एका अज्ञात वाहनानं धडक दिली. या धडकेत महिलेच्या डोक्याला गंभीर दुखापत होऊन ती जागीच ठार झाली. चौधरी यांचा महिलेचा मृतदेह शविच्छेदनासाठी उपजिल्हा रुग्णालय या ठिकाणी आणण्यात आला असून पुढील तपास येवला शहर पोलीस करत आहेत.

दरम्यान, मध्य प्रदेश सरकारच्या 'लाडली बहन' योजनेच्या धर्तीवर महाराष्ट्र शासनानं मुख्यमंत्री माझी लाडकी बहीण योजना सुरू केली आहे. नुकत्याच पार पडलेल्या अंतरिम अर्थसंकल्पात या योजनेची घोषणा करण्यात आली होती. त्यानंतर सुरुवातीला या योजनेचा लाभ घेण्यासाठी १५ जुलै पर्यंत नोंदणी करण्याचं आवाहन सरकारनं महिलांना केलं होतं.

पण मुदत खूपच कमी असल्यानं तहसील कार्यालये आणि सेतू कार्यालयांवर महिला वर्गाची मोठी झुंबड उडाली होती. यातून काही तलाठ्यांनी या महिलांकडून अर्जासाठी पैसे उकळल्याचे प्रकारही घडले आहेत. तसंच काही महिलांनी या योजनेची मुदत वाढवण्याची आणि काही अटीशर्ती शिथील करण्याची मागणी केली होती. या मागण्यांनुसार, आता या योजनेची मुदत ३१ ऑगस्टपर्यंत वाढवण्यात आली आहे. तर मूळ योजनेत आता अनेक बदल करण्यात आले आहेत.

असे आहेत नवे नियम

यामध्ये वयोमर्यादा ६० वरुन ६५ वर्षे करण्यात आली आहे. तर एकाच घरातील केवळ दोन महिलांना या योजनेचा लाभ घेता येईल. तसंच कुटुंबाचं २ लाख रुपये वार्षिक उत्पन्न असलेल्या महिलाच यासाठी पात्र आहेत. त्याचबरोबर ज्या महिलांकडं पिवळं किंवा केशरी रेशन कार्ड आहे त्यांना उत्पन्नाचा दाखला देण्याची गरज नसल्याचंही नव्या नियमावलीत स्पष्ट करण्यात आलं आहे.