नाशिक : शिक्षणाचा हक्‍क कायद्यांतर्गत खासगी शाळांमध्ये पंचवीस टक्‍के राखीव जागांवर मोफत प्रवेशाची प्रक्रिया सध्या सुरु आहे. शैक्षणिक वर्ष २०२२-२३ करीता सुरु असलेल्‍या या प्रक्रियेअंतर्गत उद्या (ता.४) दुपारी चारला सोडत जाहीर केली जाणार आहे. मंगळवार (ता.५) पासून १९ एप्रिलपर्यंत प्रवेशासाठी मुदत दिली जाणार आहे.

मागास, आर्थिकदृष्या दुर्बल घटकांतील विद्यार्थ्यांना नामांकित शाळांमध्ये शिक्षणाची संधी उपलब्‍ध होण्यासाठी राज्‍य शासनातर्फे मोफत प्रवेशाची योजना राबवते आहे. या अंतर्गत खासगी शाळांमधील पंचवीस टक्‍के जागा अशा घटकांकरीता राखीव ठेवल्‍या जात असतात.

शैक्षणिक वर्ष २०२२-२३ च्‍या प्रवेशासाठी काही दिवसांपूर्वी ऑनलाइन स्‍वरुपात अर्ज मागविण्यात आले होते. त्‍यास पालकांचा चांगला प्रतिसाददेखील मिळाला होता. प्रवेश प्रक्रियेच्‍या पुढील टप्यात उद्या (ता.४) सोडत जाहीर होणार आहे. निवड झालेल्‍या विद्यार्थ्यांसह प्रतीक्षा यादीतील विद्यार्थ्यांची यादी जाहीर केली जाणार आहे. यादीनुसार प्रवेशाची प्रक्रिया करण्याची प्रक्रिया मंगळवार (ता.५) पासून सुरु होणार आहे.

अशा आहेत सूचना

यासंदर्भात शिक्षण विभागाने सूचना जारी केल्‍या आहेत. त्‍यानुसार उद्या (ता.४) दुपारी चारनंतर आरटीई पोर्टलवर यादी प्रसिद्ध केली जाईल. प्रवेश पात्र बालकांच्या पालकांना अर्ज करताना नोंदवलेल्या मोबाईलवर एसएमएस प्रप्त होतील. परंतु फक्त एसएमएस वर अवलंबून न राहता आरटीई पोर्टलवरील अर्जाची स्थिती या टॅबवर अर्ज क्रमांक लिहून लॉटरी लागली अथवा नाही याची माहिती करुन घेण्याच्‍या सूचना दिल्‍या आहेत.

उत्तर महाराष्ट्रातील स्‍थिती

जिल्‍हा - शाळा- उपलब्‍ध जागा - दाखल अर्ज

नाशिक - ४२२ - ४,९२७ - १६,५६७

जळगाव - २८५ - ३,१४७ - ८,३५४

धुळे - ९६ - १,०७४ - २,६६६

नंदुरबार - ४७ - ३३४ - ७८८