Nashik Bribe Crime : दारुबंदी कायद्यान्वये नोंदविण्यात आलेल्या गुन्ह्यात मदत करण्यासाठी तक्रारदार यांच्याकडून चार हजार रुपयाची लाच स्वीकारताना तालुका पोलिस ठाण्याचे पोलिस शिपाई करण थोरात याला लाचलुचपत प्रतिबंधक विभागाने पकडले.

या कारवाईमुळे येथील पोलिस दलात खळबळ उडाली आहे. (Malegaon police arrested while accepting bribe of 4 thousand Nashik Bribe Crime)

हेही वाचा : Credit Card फसवणूक....काय घ्याल काळजी?

तालुका पोलिसांकडून दारुबंदी कायद्यान्वये तक्रारदार यांच्या बहिणीविरुद्ध गुन्हा दाखल करण्यात आला होता. सदर गुन्ह्याच्या तपासात मदत करण्याकरिता पोलिस शिपाई थोरात याने तक्रारदाराकडे चार हजार रुपयाची लाच मागितली.

या संदर्भात तक्रारदाराने नाशिक येथील लाचलुचपत प्रतिबंधक विभागात तक्रार नोंदविली. सदर तक्रारीवरून लाचलुचपत प्रतिबंधक विभागाच्या पथकाने पडताळणी करून सापळा रचला. तालुका पोलिस ठाण्याच्या दक्षिणेकडील पार्किंगमध्ये तक्रारदाराकडून चार हजार रुपयाची लाच स्वीकारताना थोरात याला पकडण्यात आले.

त्याच्याविरुद्ध गुन्हा नोंदविण्याचे काम सुरु आहे. लाचलुचपत प्रतिबंधक विभागाच्या पोलिस अधिक्षक शर्मिष्ठा घारगे-वालावरकर यांच्या मार्गदर्शनाखाली ही कारवाई करण्यात आली.