Nashik News: मराठा विद्याप्रसारक समाज संस्‍थेतर्फे शिव महोत्‍सवाचे सोमवार (ता. २७)पासून १ डिसेंबरदरम्‍यान आयोजन केले आहे. त्याअंतर्गत ‘कुळवाडीभूषण शिवराय’ या ग्रंथापासून शिवप्रतिमेची विश्‍वविक्रमी ग्रंथ रांगोळी साकारली आहे. ही ग्रंथ रांगोळी विद्यार्थी, नाशिककरांना पाहाण्यासाठी खुली राहणार आहे.
तसेच यादरम्‍यान पुस्‍तक प्रकाशन, किल्‍ले बनवा, छत्रपती शिवराय शिष्यवृत्ती योजना असे विविध उपक्रम पार पडतील, अशी माहिती मराठा विद्याप्रसारक समाज संस्‍थेचे सरचिटणीस ॲड. नितीन ठाकरे यांनी पत्रकार परिषदेत दिली.
याप्रसंगी मविप्र संस्‍थेचे सभापती बाळासाहेब क्षीरसागर, उपाध्यक्ष विश्‍वास मोरे, संचालक ॲड. संदीप गुळवे, विजय पगार आदी उपस्‍थित होते. (Maratha Vidya Prasarak Samaj Sanstha organizes Shiv Mahotsav from Monday 27 nov nashik news)
ॲड. ठाकरे म्‍हणाले, की गंगापूर रोडवरील मविप्र संस्‍थेच्‍या ॲड. बाबूराव गणपतराव ठाकरे अभियांत्रिकी महाविद्यालयाच्‍या मैदानावर ग्रंथ रांगोळी साकारली आहे. त्‍यासाठी श्रीकांत देशमुख लिखित ‘कुळवाडीभूषण शिवराय’ या ग्रंथाच्‍या विविध रंगांतील प्रतिंचा वापर केला आहे. प्रदर्शनाला भेट देण्यास येणाऱ्यांसाठी उंचीवरून शिवप्रतिमा पाहाण्यासाठीची व्यवस्था केलेली आहे. यानिमित्त विविध उपक्रम येत्‍या १ डिसेंबरपर्यंत पार पडतील.
पुस्‍तकाचे उद्या प्रकाशन
‘कुळवाडीभूषण शिवराय’ची पाचवी आवृत्ती मविप्र संस्‍थेच्‍या प्रिंटिंग विभागात छापण्यात आली आहे. या आवृत्तीचा प्रकाशन सोहळा सोमवारी (ता. २७) सायंकाळी पाचला मविप्र संस्‍थेच्‍या अभियांत्रिकी महाविद्यालय सभागृहात पार पडेल. या कार्यक्रमास ‘एमकेसीएल’चे विवेक सावंत, ज्‍येष्ठ अभिनेते मिलिंद गुणाजी, यशवंतराव चव्‍हाण महाराष्ट्र मुक्‍त विद्यापीठाचे कुलगुरू डॉ. संजीव सोनवणे, सावित्रीबाई फुले पुणे विद्यापीठाचे प्र-कुलगुरू डॉ. पराग काळकर आदी मान्‍यवर उपस्‍थित राहातील.
विद्यार्थ्यांसाठी शिष्यवृत्ती योजना
प्रदर्शनानंतर सर्व ७५ हजार पुस्‍तकांचे विद्यार्थ्यांना वाटप केले जाईल. वाचनसंस्‍कृती वृद्धिंगत व्‍हावी, यासाठी छत्रपती शिवराय शिष्यवृत्ती योजना राबविली जाईल. याअंतर्गत पुस्‍तकावर आधारित शालेय स्‍तरावरील परीक्षा घेतली जाईल. यातून शंभर विद्यार्थ्यांना प्रत्‍येकी दहा हजार रुपयांची शिष्यवृत्ती दिली जाणार आहे. दर वर्षी ही योजना राबविण्याचा मानस ॲड. ठाकरे यांनी व्‍यक्‍त केला.
शिव महोत्‍सवातील ठळक बाबी
- ग्रंथ रांगोळीचा आकार १५२ फूट लांब, ११२ फूट रुंद
- ७५ हजार ग्रंथांचा वापर करून साकारली ग्रंथ रांगोळी
- १ डिसेंबरपर्यंत सायंकाळी पाच ते रात्री दहादरम्‍यान भेट देण्याची संधी
- प्रदर्शनस्‍थळी विद्यार्थ्यांनी साकारले ६६ गडकिल्‍ले
- गडकिल्ल्‍यांची आकर्षक सजावट ठरतेय लक्षवेधी
- आठवी ते दहावीच्‍या विद्यार्थ्यांचा सहभाग, स्‍पर्धेत देणार बक्षिसे
- शिवचरित्रावरील ठळक प्रसंगांची चित्र स्वरूपात मांडणी
- कलाशिक्षक, विद्यार्थ्यांनी रेखाटलेल्‍या चित्रांचे प्रदर्शन
- शिवकालीन जतन केलेली नाणी (शिवराई) पाहता येणार
- शौर्याचे प्रतीक असलेली प्रतीकात्‍मक शिव तलवार बघण्याची संधी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.