सातपूर (नाशिक) : भोंगा आंदोलन प्रकरणी गेल्या काही दिवसांपासून फरारी मनसे (MNS) शहराध्यक्ष यांना सातपूर पोलिसांनी पाथर्डी परिसरातून अटक केल्याचे सातपूर पोलिसांनी सांगितले. दरम्यान, मनसे अध्यक्ष राज ठाकरे (Raj Thackeray) यांनी मशिदीवरील भोंगा काढण्याबाबत अल्टिमेटम दिल्यानंतर नाशिकसह राज्यभरात हनुमान चालिसा पठण करण्याचे आंदोलन करण्यात आले होते.

पोलिसांच्या नोटीसेनंतरही केले आंदोलन

यामुळे जातीय तेढ निर्माण होवू नये म्हणून नाशिक पोलिसांनी नोटीसही बजावल्या होत्या. तरीही आंदोलन करण्यात आले. त्या पार्श्वभूमीवर नाशिक पोलिसांनी मनसे नेते व इतर कार्यकर्त्याची धरपकड केली होती. अनेक कार्यकर्ते तडीपार करण्यात आले होते. दरम्यान, मनसे जिल्हाध्यक्ष अंकुश पवार व शहराध्यक्ष दिलीप दातीर हे फरारी असल्याचे बोलले जात होते. नुकतेच दातीर यांना सातपूर पोलिसांनी पाथर्डी परिसरातून अटक केली आहे.