मनमाड (जि. नाशिक) : शहरातील आठवडे बाजारातून मोबाईल चोरी करणाऱ्या दोन संशयित आरोपींना शहर पोलिसांच्या पथकाने शिताफिने अटक करून त्यांच्याकडून दोन महागडे मोबाईल जप्त केले. (mobile phone theft robbers jailed Nashik Crime News)

हेही वाचा : भारतीय क्रिकेटची नवी आशा- पृथ्वी शाॅ

रविवारी मनमाड शहरात भरलेल्या आठवडे बाजारात खरेदीसाठी आलेल्या दोन नागरिकांचे मोबाईल चोरीस गेले होते. त्यांनी दिलेल्या फिर्यादीवरून मनमाड पोलिसांनी गुन्हा दाखल केला होता. प्रभारी पोलिस निरीक्षक प्रल्हाद गीते यांनी तत्काळ आठवडे बाजारात पेट्रोलिंगसाठी अधिकारी व कर्मचारी यांची नेमणूक केली होती.

पोलिस पथक आठवडे बाजारात पेट्रोलिंग करत असताना साई प्रसन्न लॉन्स समोर त्यांना दोन जण संशयास्पद हालचाल करताना आढळले. त्यानंतर पोलिसांनी यावेळी सुनील पवार (वय २२), लकी परबसिंग सोलंकी (वय २०) दोघेही रा. भोपाळ, मध्यप्रदेश यांना ताब्यात घेत त्यांच्याकडे चौकशी व झडती घेतली असता त्यांच्याकडे दोन महागडे मोबाईल मिळून आले.

यावेळी पोलिसांनी त्यांच्याकडून एक दुचाकीही जप्त केली. संशयितांकडून अधिक गुन्हे उघडकीस येण्याची शक्यता आहे.