येवला : जागतिक पर्यावरण दिनानिमित्त येथील तालुका प्रशासकीय संकुलात वृक्षारोपण करण्यात आले. या वेळी चिंच आणि जांभळाचे झाड लावून तहसीलदार प्रमोद हिले यांच्या संकल्पनेतून माझे झाड, माझा सेल्फी अभियानाला सुरवात झाली. पर्यावरणाच्या रक्षणासाठी प्राधान्याने पावले उचलण्याची गरज आहे. कोरोनाकाळात स्वच्छ, सुरक्षित आणि शाश्वत पर्यावरणाचं महत्त्व कधी नव्हे इतकं लक्षात आलं आहे. त्यामुळे ‘माझे झाड, माझा सेल्फी’ अभियान राबविण्यात येत असल्याचे हिले यांनी सांगितले.

या संकल्पनेचा उद्देश जास्तीत जास्त वृक्षलागवड करून त्याद्वारे पृथ्वीचे संवर्धन करणे आहे. यासाठी प्रत्येकाने घरापुढे एक झाड लावावे, त्या झाडासोबत आपला सेल्फी व्हॉट्सॲप ग्रुपवर टाकावा, जेणेकरून इतरांनाही या संकल्पनेपासून प्रेरणा मिळून अधिकाधिक प्रमाणात वृक्षलागवड करून त्यांचे संगोपन केले जाईल, असे त्यांनी सांगितले.

या वेळी प्रत्येक अधिकाऱ्याला एक रोप भेट देण्यात आले. ते झाड त्यांनी माझ्या मुलाचे झाड किंवा माझ्या मुलीचे झाड समजून लावावे व त्याचे संवर्धन करावे. पर्यावरण हा आपल्या जगण्यासाठीचा अत्यावश्यक घटक आहे व येणाऱ्या पिढ्यांसाठी त्याचे जतन व संवर्धन केले पाहिजे, असे आवाहन हिले यांनी केले. तहसीलदार हिलेंसह गटविकास अधिकारी अन्सार शेख, शहर पोलिस निरीक्षक भगवान मथुरे, उपअधीक्षक भूमिअभिलेख श्री. राजपूत, तालुका आरोग्याधिकारी डॉ. हर्षल नेहते, नायब तहसीलदार श्रीमती पंकज मगर, सहायक पोलिस निरीक्षक नितीन खंडागळे, पिंपळगाव जलाल येथील जय भवानी सामाजिक व सांस्कृतिक संस्थेचे विजय भोरकडे व त्यांचे सहकारी यांच्यासह येवला प्रशासकीय संकुलातील सर्व विभागांचे अधिकारी व कर्मचारी उपस्थित होते.

■ देवदरी वनहद्दीत वृक्षारोपण

जागतिक पर्यावरण दिन साजरा करत ममदापूर संवर्धन राखीव क्षेत्रातील देवदरी पर्यटन निवास येथे रविवारी (ता. ५) वृक्षारोपण करण्यात आले. तालुका वनपरिक्षेत्र अधिकारी अक्षय म्हेत्रे यांच्या नियोजनाखाली वनपाल मोहन पवार, वनरक्षक गोपाळ हरगावकर, गोपाल राठोड, बाळासाहेब दाणे, रामनाथ भोरकडे, दादा मोहन, दत्तात्रेय गोसावी, मनोहर दाणे, राजेंद्र आवारे, मच्छिंद्र आरखडे, लाला त्रिभुवन यांच्या उपस्थितीत वड, चिंच, जांभूळ इतर झाडे लावून जागतिक पर्यावरण दिन साजरा केला. झाडांचं स्थान किती महत्त्वाचे आहे, झाडापासून होणारे फायदे याची माहिती देण्यात आली.