Nashik Onion Rate : येथील बाजार समिती व करंजाड उपबाजार आवारात शुक्रवारी (ता. २७) एक हजार ६०० वाहनांमधून सुमारे २९ हजार क्विंटल उन्हाळ कांद्याची विक्रमी आवक झाली.

कांद्याने पहिल्यांदा पाच हजार ५०० चा टप्पा गाठला असून, गेल्या आठवड्यापेक्षा कांद्याच्या भावात सरासरी एक हजार रुपयांची वाढ झाली. (Nampur Bazar Samiti Summer Onion highest price of 5505 nashik news)

उन्हाळ कांद्याला पाच हजार ५०० ते पाच हजार ५०५ रुपये प्रतिक्विंटल असा सर्वोच्च, चार हजार ७०० रुपये प्रतिक्विंटल असा सरासरी भाव मिळाल्याची माहिती बाजार समितीचे सभापती भाऊसाहेब अहिरे व उपसभापती भाऊसाहेब कांदळकर यांनी दिली.

यंदा आठवड्याच्या सुरवातीपासून कांद्याचे भाव वधारल्याने येथील बाजार समितीत उन्हाळ कांद्याची विक्रमी आवक झाली. या तेजीमुळे शेतकरी समाधानी आहेत. यंदा पावसाअभावी लाल कांद्याची आवक सुमारे एक महिना उशिराने होणार असल्याने आगामी काळात नवीन कांदा बाजारात येईपर्यंत कांद्याचे दर टिकून राहतील, अशी शेतकऱ्यांना अपेक्षा आहे.

नामपूरला एक हजार ३२ वाहने, तर करंजाडला ५६७ वाहनांचे लिलाव करण्यात आले. शेतकऱ्यांनी मालाची प्रतवारी करून माल विक्रीस आणावा, लिलाव झाल्यावर संबंधित व्यापाऱ्यांकडून रोख पेमेंट घ्यावे, शेतकऱ्यांनी वाहन पार्किंग करताना बाजार समिती प्रशासनास सहकार्य करावे, असे आवाहन सचिव संतोष गायकवाड, अरुण अहिरे यांनी केले आहे. दरम्यान, लाल कांदा बाजारात आल्याने कांद्याच्या भावाला झळाळी मिळाली आहे. दिवाळीपर्यंत कांद्याचे भाव चढेच राहतील. शेतकऱ्यांनी टप्प्याटप्प्याने माल बाजारात आणावा.

लाल कांदा बाजारात न आल्यास उन्हाळ कांदा अजून उसळी घेईल. शेतकऱ्यांना फायदा मिळत असेल तर केंद्र सरकारने आडकाठी आणू नये, असे कांदा निर्यातदार शरद देवरे यांनी म्हटले आहे.