नाशिक : शिवसेना उद्धव बाळासाहेब ठाकरे गटाचे खंदेसमर्थक व जिल्हाप्रमुख सुधाकर बडगुजर यांना शहर पोलिस आयुक्तालयाने बजाविलेल्या तडीपारीच्या नोटिसप्रकरणी अंशत: दिलासा मिळाला असून, उपायुक्तांनी त्यांना दहा दिवसांची मुदतवाढ दिली आहे. त्यामुळे ऐन निवडणुकीदरम्यान तडीपारीच्या कारवाईपासून त्यांना मोठा दिलासा मिळाल्याचे मानले जात आहे. सुधाकर बडगुजर यांना २०१४ मधील सरकारी कामात अडथळा आणल्याप्रकरणीच्या गुन्ह्यात शिक्षा ठोठावण्यात आली आहे. (10 days extension to Sudhakar Badgujar by Deputy Commissioner )

परंतु याविरोधात बडगुजर यांना मुंबई उच्च न्यायालयात धाव घेतलेली आहे. याच प्रकरणात शहर परिमंडळ दोनच्या उपायुक्त मोनिका राऊत यांनी चौकशी करून बडगुजर यांना तडीपारी करण्यासंदर्भातील नोटीस ९ तारखेला बजावली होती. त्यासंदर्भात बडगुजर यांनी नोटीसला उत्तर देण्यासाठी १० दिवसांची मुदत मागितली होती. (latest marathi news)

त्यानुसार, शनिवारी (ता. १८) बडगुजर यांनी उपायुक्त मोनिका राऊत यांची भेट घेत, त्यांना उच्च न्यायालयातून कागदपत्रे मिळाले नाहीत, त्यामुळे आणखी मुदतवाढ मिळावी, अशी मागणी केली. त्यानुसार, उपायुक्त राऊत यांनी त्यांना येत्या २७ तारखेपर्यंत संबंधित कागदपत्रे सादर करण्यासाठी १० दिवसांची मुदतवाढ दिली आहे.

बडगुजर हे शिवसेना उद्धव बाळासाहेब ठाकरे पक्षाचे जिल्हा प्रमुख असून, ऐन लोकसभा निवडणुकीचा काळात यांच्याविरोधात तडीपारीची नोटीस बजाविल्याने राजकीय क्षेत्रात उलटसुलट चर्चांना उधाण आले होते.