Junior College Admission : इयत्ता अकरावीच्‍या प्रवेशाला आत्तापर्यंत झालेल्‍या तीन फेऱ्यांमध्ये अल्‍प प्रतिसाद मिळाला असून, तब्‍बल ६२ टक्‍के जागा रिक्‍त आहेत. दरम्‍यान पहिल्‍या विशेष फेरीत पाच हजारांहून अधिक विद्यार्थ्यांनी सहभाग नोंदविला असून, सोमवारी (ता.५) गुणवत्ता यादी प्रसिद्ध होणार आहे. नाशिक महापालिका क्षेत्रातील कनिष्ठ महाविद्यालयांमध्ये इयत्ता अकरावी प्रवेशासाठी ऑनलाइन केंद्रीभूत प्रवेश प्रक्रिया राबविली जात आहे. (11th Admission First Special Round List Today )

दरवर्षी दुसऱ्या व तिसऱ्या फेरीत मोठ्या संख्येने विद्यार्थी प्रवेश निश्‍चित करतात. परंतु यंदा पात्रतेसंदर्भातील अटींमुळे आधीच गुणवत्ता यादीत निवड होणाऱ्या विद्यार्थ्यांची संख्या कमी राहत असून, त्‍यातही अनेक विद्यार्थी प्रवेश निश्‍चिती करत नसल्‍याचे समोर येत आहे. यामुळे अकरावीच्‍या तब्‍बल ६२ टक्‍के जागा अद्यापही रिक्‍त असल्‍याची तीन नियमित फेऱ्यांनंतरची स्‍थिती आहे. विद्यार्थ्यांना प्रवेशाची संधी उपलब्‍ध करून देण्याच्‍या उद्देशाने पहिली विशेष फेरी राबविली जात असून, सहभागासाठी नोंदणीची मुदत यापूर्वी दिलेली होती. (latest marathi news)

या फेरीच्‍या प्रवेश वेळापत्रकानुसार रविवार (ता.४) पर्यंत माहिती विश्‍लेषणासाठी वेळ राखून ठेवलेला होता. पुढील टप्प्‍यात सोमवारी (ता.५) गुणवत्ता यादी प्रसिद्ध होणार आहे. निवड झालेल्‍या विद्यार्थ्यांना गुरुवार (ता. ८) पर्यंत प्रवेशाची मुदत आहे. नियमित जागांसाठी प्रवेश होताना यासोबतच विविध कोट्यांतर्गत उपलब्‍ध जागांवर प्रवेशासाठीही प्रक्रिया सुरु आहे. व्‍यवस्‍थापन, इनहाऊस व अल्पसंख्याक कोट्याच्‍या जागांसाठी पात्रताधारक विद्यार्थ्यांना प्रवेश घेता येणार आहे.

आकडेवारी दृष्टीक्षेपात..

- प्रवेशासाठी उपलब्‍ध जागा- २८ हजार ४००

- प्रवेश घेतलेली विद्यार्थी संख्या- १० हजार ६८४

- रिक्‍त असलेल्‍या जागा- १७ हजार ७१६