Nashik News : शहरात घडलेल्‍या वेगवेगळ्या घटनांमध्ये तीन अल्‍पवयीन मुलींना कुणीतरी फूस लावून पळवून नेल्‍याचे उघडकीस आले आहे. याप्रकरणी पालकांनी पोलिस ठाण्यात धाव घेताना कायदेशीर रखवालीतून पळवून नेणाऱ्या अज्ञातांविरोधात अपहरणाचा गुन्‍हा दाखल केला आहे. पहिल्‍या घटनेत गेल्‍या २७ एप्रिलला सकाळी सव्वासातला विकास मधुकर मते यांनी त्‍यांच्‍या पंधरावर्षीय भाचीला पंचवटी एक्‍स्‍प्रेसमध्ये बसविले होते. (Nashik Abduction of 3 minor girls from city)

मात्र त्याच दिवशी सायंकाळी साडेपाचच्‍या सुमारास अमृतधाम भागातील के. के. वाघ महाविद्यालयाकडून जात असताना त्‍यांची भाची काळ्या रंगाच्‍या गाडीवर अनोळखी मुलासोबत दिसून आली. याप्रकरणी त्‍यांनी आडगाव पोलिस ठाण्यात धाव घेताना भाचीचे अपहरण झाल्‍याची फिर्याद दाखल केली आहे.

दुसऱ्या घटनेत पंधरावर्षीय मुलीला कुणीतरी फूस लावून पळवून नेल्‍याची फिर्याद महिलेने अंबड पोलिस ठाण्यात दिली आहे. सारिका कृष्णा शिंदे यांनी दिलेल्‍या फिर्यादीनुसार त्‍यांची पंधरावर्षीय मुलीला बुधवारी (ता. ८) सायंकाळी पाचच्‍या सुमारास सिडकोतील साईबाबानगर येथून कशाचे तरी आमिष दाखवत कायदेशीर रखवालीतून पळवून नेल्‍याचे नमूद केले आहे.

तिसऱ्या घटनेत नाशिक रोड भागातील सुभाष रोड, पवार वाडी येथून सतरा वर्षे ८ महिने वय असलेली अल्‍पवयीन मुलगी बेपत्ता झालेली आहे. तिचे वडील मेहबूब शेख यांनी नाशिक रोड पोलिस ठाण्यात फिर्याद दिली आहे. त्‍यानुसार बुधवारी (ता. ८) रात्री साडेअकराच्‍या सुमारास त्‍यांची मुलगी ही बाथरुमला जाऊन येते, असे सांगून घराबाहेर पडली.

परंतु ती पुन्‍हा न परतल्‍याने घरच्‍यांनी तिचा शोध घेतला असता, ती सापडून आली नाही. यानंतर वडिलांनी पोलिस ठाण्यात धाव घेत कुणीतरी फूस लावून तिचे अपहरण करत पळवून नेल्‍याचे फिर्याद दिली आहे.