वडांगळी : मनेगाव (ता. सिन्नर) येथे नाशिक पुणे महामार्गावर स्विफ्ट कार अपघातात बारागाव पिंप्रीच्या होतकरू युवकाचा मृत्यू झाला आहे. संगमनेरहून सिन्नरकडे स्विफ्ट कारने (एमएच १४, टीएस ६७४४) गौरव शंकर उगले (२७ ) घराकडे परतत असताना गुरुवारी (ता.१०) रात्री सव्वा दहाच्या सुमारास हा अपघात झाला आहे. कार गतिरोधकाजवळ स्लीप झाल्याने तीन- चार वेळा पलटी होऊन रस्त्याच्याकडील नाल्यात पलटी झाली. (Accidental death of one in Baragaon Pimpri at highway )

त्यात चालक गौरवच्या डोक्याला गंभीर मार लागला. सोबत असलेला सहकारी जखमी झाला आहे. सिन्नरला खासगी दवाखान्यात नेण्यापूर्वीच गौरवचा मृत्यू झाला असे डॉक्टरांनी सांगितले. गौरव शेती व्यवसाय सांभाळून हौसिंग कर्ज प्रकरणाची कामे करत होता. वडील शंकर उगले विहिरीसाठी बोअरवेलचे काम करतात. तो त्यांचा एकुलता मुलगा होता. होतकरू युवकाचा अपघाती मृत्यू झाल्याने परिसरात हळहळ व्यक्त होत आहे. बारागांवपिंप्री येथे सकाळी शोकाकुल वातावरणात अंत्यसंस्कार करण्यात आले.