Nashik Agriculture News : तालुक्यातील बहुतांशी भागात पेरणीयोग्य पाऊस झाला आहे. परिणामी पेरण्यांच्या कामाला वेग आला आहे. तालुक्याच्या माळमाथा भागात कपाशी लागवडीची धूम आहे. तर उर्वरीत भागात मका व बाजरी ही पारंपारिक पीके घेण्याकडे शेतकऱ्यांचा कल आहे. तालुक्यात आतापर्यंत ४५ टक्के पेरण्या झाल्या आहेत. हवामान विभागाने आगामी आठवड्यात दमदार पावसाची शक्यता वर्तविली आहे. (Agriculture rain in Malegaon taluka But wait for heavy rain )

त्यामुळे जूनअखेर ७० टक्क्यापेक्षा अधिक पेरण्या होण्याची शक्यता आहे. यावर्षी मृग नक्षत्रात समाधानकारक पावसाने हजेरी लावली. कमी-अधिक प्रमाणात सर्वत्र पाऊस झाला. तालुक्यात वडेल येथे पंधरा दिवसापुर्वी तर लखाणे येथे काल ढगफुटीसदृश पाऊस झाला आहे. कृषी विभागाने शंभर मिलीमीटर पाऊस झाल्यानंतरच पेरण्या करण्याचे शेतकऱ्यांना आवाहन केले होते.

तालुक्यातील दहापैकी सहा मंडळांमध्ये शंभर मिलीमीटरपेक्षा अधिक पाऊस झाला आहे. निमगाव, दाभाडी, करंजगव्हाण या मंडळांमध्येही ९० मिलीमीटरपेक्षा अधिक पाऊस झाला. केवळ कुकाणे मंडळात कमी पाऊस झाला आहे. पेरणीयोग्य पावसामुळे बळीराजा काळ्या आईच्या कुशीत रमला आहे. मका, बाजरी, कपाशी आदींची पेरणी केली जात आहे.

खरीप हंगाम जोमात सुरु आहे. या पाश्‍र्वभूमीवर शेतमजुरांनाही काम मिळू लागले आहे. काही शेतकरी अजूनही पुरेशा पावसाच्या प्रतिक्षेत आहेत. हवामान विभागाने येत्या काही दिवसात दमदार पावसाचे भाकित वर्तविले आहे. हवामान विभागाचा अंदाज खरा ठरला. तसेच तालुक्यात सर्वत्र दमदार पाऊस झाला तर यावर्षी जुलैच्या पहिल्या आठवड्यापर्यंत पेरण्यांची कामे पुर्ण होवू शकतील. (latest marathi news)

मंडलनिहाय झालेला पाऊस

मालेगाव : १०२.५

दाभाडी : ८५.१

वडनेर : १००.७

करंजगव्हाण : ९४.४

झोडगे : ११८.२

कळवाडी : १११.७

कुकाणे : ३२.५

सौंदाणे : १६७.६

सायने : ११९.९

निमगाव : ९६.७