नाशिक : नाशिकरोड मध्यवर्ती कारागृहात शिक्षा भोगत असलेल्या कुख्यात गँगस्टर अबू सालेम यास भेटण्यासाठी आलेल्या त्याच्या मैत्रीणीसह एका परदेशी व्यक्तीला दहशतवाद विरोधी पथकाने (एटीएस) ताब्यात घेतले आहे. दोघांची रात्री उशिरापर्यंत चौकशी सुरु होती. (ATS Interrogates two visited Abu Salem)

मुंबई बॉम्बस्फोटातील आरोपी व कुख्यात गँगस्टर अबू सालेम सध्या नाशिक रोड मध्यवर्ती कारागृहात शिक्षा भोगत आहे. गुरुवारी (ता. १०) सकाळी त्याची मैत्रीण हीना ही त्याला भेटण्यासाठी नाशिक रोड कारागृहात आली होती. तिच्यासोबत आणखी एक जण असल्याची माहिती दहशतवाद विरोधी पथकास समजताच त्यांनी कारागृह गाठून दोघांना चौकशीसाठी ताब्यात घेतले.

दोघांना कडेकोट बंदोबस्तामध्ये नाशिक रोड पोलिस ठाण्यात नेले. यावेळी एटीएससह राज्य गुप्तचर विभागाचेही पथक आणि शहर गुन्हे शाखेचे पथकही उपस्थित होते. हीना ही सालेम यास भेटण्यासाठी का आली, तिच्या भेटीमागील उद्देश तसेच यापूर्वीचे तपशीलही चौकशीतून घेण्यात येत होते. दरम्यान, हीना सोबत असलेला संशयित हा नागपूरच्या गुंडाला भेटण्यासाठी आल्याचे चौकशीत सांगितल्याचे समजते. रात्री उशिरापर्यंत ही चौकशी सुरू होती.