Nashik News : गेल्या शुक्रवारी (ता. १२) पासून बेपत्ता असलेल्या सिन्नर शहरातील विजयनगर भागात राहणारे बॅटरी व्यावसायिक मुकुंद पुरुषोत्तम सारडा (वय ५०) यांचा मृतदेह तब्बल आठवडाभरानंतर इगतपुरी तालुक्यातील घाटनदेवीच्या जंगलात आढळून आला. विषारी औषध प्राशन करून सारडा यांनी आत्महत्या केली असावी, असा प्राथमिक अंदाज आहे. (Nashik body of missing businessman from Sinnar was found in Ghatandevi forest)

गुरुवारी (ता. १८) दुपारी इगतपुरी पोलिसांना घाटणदेवीच्या जंगलात अनोळखी पुरुषाचा मृतदेह आढळून आल्याच्या समजले. पोलिसांनी मृतदेहाची तपासणी केली असता मुकुंद सारडा यांची ओळख पटली. श्री. सारडा यांचा सिन्नर येथे इलेक्ट्रिकल बॅटरी रिपेरिंग व विक्रीचा व्यवसाय होता. गेल्या शुक्रवारी घरातून दुकानात जातो असे सांगून बाहेर पडले.

मात्र, ते दुकानात पोहोचलेच नाही. तेव्हापासून ते बेपत्ता झाले होते. कुटुंबियांनी सिन्नर पोलिस ठाण्यात हरवल्याची तक्रार दिली होती. संपूर्ण आठवडा नातेवाईक व सिन्नर पोलिस त्यांचा सर्वत्र शोध घेत होते. यासंदर्भात इगतपुरी पोलिस ठाण्यात नोंद करण्यात आली आहे.