Nashik News : सिटीलिंक बसचालकांनी मागण्यांसाठी शनिवारी (ता. २७) संप पुकारला आहे. यामुळे शहराची सार्वजनिक वाहतूक सेवा कोलमडली आहे. बससेवा बंद झाल्याने हा संप रिक्षाचालकांच्या पथ्यावर पडला आहे. त्यांच्याकडून याचा पुरेपूर फायदा घेत अतिरिक्त प्रवासी भाडे आकारत खिशा भरण्याचे काम सुरू आहे. शनिवारपासून सिटी लिंक बसचालकांकडून विविध मागण्यांसाठी संप पुकारण्यात आला होता. (Citylink strike rickshaw pullers are charging extra fare and transporting passengers beyond capacity )

रविवारी दुसऱ्या दिवशीही त्यामुळे बससेवा ठप्प झाली होती. प्रवाशांना प्रवास करण्यासाठी रिक्षा व्यतिरिक्त दुसरे कुठलेही साधन राहिली नाही. त्यात रविवारची सुटी असल्याने बहुतांशी नागरिक शहरातील मुख्य बाजारपेठेत खरेदीसाठी आले होते. तर काही नागरिक विविध कामानिमित्ताने शहरात दाखल झाले होते. त्यांना ये-जा करण्यासाठी रिक्षाने प्रवास करण्या व्यतिरिक्त पर्याय राहिला नव्हता. (latest marathi news)

त्यामुळे रिक्षा चालकांची चांगलीच चंगळ झाली होती. विविध मार्गावरील रिक्षाचालक प्रवाशांकडून अतिरिक्त पैसे घेताना आढळून आले. विशेष करून शालीमार ते नाशिक रोड, द्वारका ते नाशिक रोड या भागावरील रिक्षाचालक मनमानी पद्धतीने भाडे आकारताना आढळून आले. शालिमार ते नाशिक रोड रिक्षाचालकांनी प्रवाशांकडून दहा ते वीस रुपये अतिरिक्त घेतल्याचे प्रवासंकडून सांगण्यात आले.

इतकेच नाही तर एका रिक्षात क्षमतेपेक्षा अधिक मागेपुढे प्रवासी बसवून वाहतूक करण्यात आली. चालकाच्या छोट्याशा सीटवरदेखील चालकासह अन्य दोन प्रवासी प्रवास करताना आढळून आले. अतिरिक्त पैसे आणि प्रवासी यामुळे रिक्षा चालकांचा व्यवसाय जोरदार सुरू होता. तर दुसरीकडे चालकाशेजारी अतिरिक्त प्रवासी बसवून वाहतूक केली जात असल्याने चालक आणि प्रवाशांनी स्वतःचा जीव धोक्यात घातला होता. अशाच प्रकारचे चित्र शहराच्या विविध भागात बघावयास मिळाले.