Nashik News : मुंबई व ठाणे महापालिकेकडून वृत्तपत्र विक्रेत्यांच्या स्टॉलला कायमस्वरूपी परवाना देण्यात आला आहे. त्याच धर्तीवर नाशिक महापालिकेतील वृत्तपत्र विक्रेत्यांच्या स्टॉललादेखील कायमस्वरूपी परवाना द्यावा, अशी मागणी नाशिक रोड वृत्तपत्र विक्रेता सेवाभावी संस्थेतर्फे महापालिका आयुक्त डॉ. अशोक करंजकर यांच्याकडे करण्यात आली. आयुक्तांनी तातडीने दखल घेत जाहिरात व परवाना विभागाला या संदर्भात अभ्यास करून धोरण ठरविण्याच्या सूचना दिल्या. (nashik Commissioner Dr Karanjkar statement of Newspaper vendors marathi news )

शहरामध्ये मोठ्या प्रमाणात वृत्तपत्र विक्रेते आहे. मुख्यत्वे पहाटे शहरात विविध ठिकाणी स्टॉल लावले जातात. महापालिका क्षेत्रात वृत्तपत्र विक्रेत्यांचे पहाटेपासून साधारण दुपार चारपर्यंत वृत्तपत्र व मासिकांची विक्री होत असते. वृत्तपत्र विक्रेत्यांची वृत्तपत्र विक्री करण्याची वेळ साधारण सकाळी असते. या दरम्यान वाहतुकीला किंवा सार्वजनिक ठिकाणी अडथळा निर्माण होत नाही.  (latest marathi news)

त्यामुळे अतिक्रमण विभागाकडून कारवाई होऊ नये, अशी अपेक्षा या वेळी आयुक्तांच्या भेटीत व्यक्त करण्यात आली. त्याचप्रमाणे मुंबई व ठाणे महापालिकेने वृत्तपत्र विक्रेत्यांच्या स्टॉलला परवाना दिला आहे. त्याच धर्तीवर नाशिक महापालिका हद्दीमध्येदेखील धोरण निश्‍चित करावे, अशी अपेक्षा व्यक्त करताना यासाठी परवाना शुल्क भरण्याची तयारी वृत्तपत्र विक्रेत्यांनी दाखविली.

आयुक्तांनी वृत्तपत्र विक्रेत्यांच्या मागणीची दखल घेत कर उपायुक्त श्रीकांत पवार यांना या संदर्भात धोरण तयार करून महासभेवर ठेवण्याच्या सूचना दिल्या. या वेळी नाशिक रोड वृत्तपत्र विक्रेता सेवाभावी संस्थेचे अध्यक्ष सुनील मगर, उपाध्यक्ष बाबासाहेब ओहोळ, उपाध्यक्ष जितेंद्र भोसले, कार्याध्यक्ष उल्हास कुलथे, सचिव गौतम सोनवणे, खजिनदार योगेश भट, भारत माळवे, सदस्य संजय चव्हाण, रवी सोनवणे, हर्षल ठोसर, संपत निरभवणे, मधुकर सोनार, बंटी भालेराव आदी उपस्थित होते.