गणूर : शेतमशागतीसाठी वापरात येणाऱ्या ट्रॅक्टर रोटरमध्ये अडकून बालकाचा करूण अंत झाल्याची घटना आज (ता. १७) सोमवार रोजी दुपारी घडली. याबाबत चांदवड पोलिसांत ट्रॅक्टर चालकावर मोटर वाहन कायद्याअंतर्गत गुन्हा दाखल करण्यात आला आहे. (Nashik 13 year old boy got stuck in rotor die)

मंगरूळ ता. चांदवड येथील गुरुद्वारा परिसरात धाकराव वस्तीजवळ असलेल्या शेतात शेतमशागतीचे काम सुरू होते. यावेळी परमवीरसिंग हरमितसिंग बेदी हा तेरा वर्षीय बालक आपल्या कुटुंबीयांसोबत शेतातील कचरा वेचण्याचे काम करत होता. त्याच वेळी ट्रॅक्टर चालक मलकितसिंग बेदी हे ट्रॅक्टर रिव्हस घेत असताना परमवीरसिंग हा बालक रोटरमध्ये अडकला व काही क्षणांत कंबरेपर्यंत रोटर मशीन मध्ये ओढला गेला.

त्याला तत्काळ मशीन मधून काढत चांदवड येथील उपजिल्हा रुग्णालयात दाखल केले. मात्र पायाच्या बाजूने कंबरेपर्यंतचा भाग रोटर मध्ये फिरला गेल्याने अत्यावस्थ अवस्थेत असलेल्या परमवीरसिंग या बालकाला डॉक्टरांनी तपासून मृत घोषीत केले. याबाबत अमरजीतसिंग कुलदीप सिंग बेदी यांच्या फिर्यादीवरून ट्रॅक्टर चालक आरोपी मलकितसिंग कुलदीपसिंग बेदी याच्यावर मोटर वाहन कायदा व इतर कलमान्वये गुन्हा दाखल करण्यात आला आहे. (latest marathi news)

नुकताच पाऊस झाल्याने सर्वत्र शेतमशागतीचे कामांनी वेग घेतला असताना तालुक्यात घडलेल्या या दुर्दैवी घटनेने सर्वत्र हळहळ व्यक्त करण्यात येत आहे. घटनेचा तपास पोलीस निरीक्षक कैलास वाघ यांच्या मार्गदर्शाखाली पोलीस हवालदार मन्साराम बागुल करीत आहेत. घटनेची माहिती मिळताच मंगरूळ, चांदवड परिसरातील नागरिकांनी उपजिल्हा रुग्णालयात एकच गर्दी केली होती. रात्री उशिरा पर्यंत पुढील कारवाई सुरू होती.