नाशिक : नाशिकरोड परिसरातील बांधकाम व्यावसायिकाला फ्लॅट विक्री करायचे असतील तर १० लाख रुपयांची खंडणीची मागणी करणार्या संशयिताने शिवीगाळ करीत साईट बंद पाडण्याचीही धमकी दिली. याप्रकरणी नाशिकरोड पोलिसात खंडणीचा गुन्हा दाखल झाला आहे. मात्र, या घटनेमुळे नाशिकरोड परिसरातील बांधकाम व्यावसायिकांमध्ये भितीचे वातावरण निर्माण झाले आहे. (Nashik Crime Extortion of 10 lakhs was demanded from builder marathi news )

नाशिकरोड परिसरातच दोन दिवसांपूर्वी सराईत गुंडांनी एका राजकीय पक्षाच्या उपमहानगर प्रमुखाला प्रचार करण्यासाठी खंडणीची मागणी केल्याची घटना ताजी असतानाच, आता थेट बांधकाम व्यावसायिकालाच खंडणीसाठी धमकी दिल्याच्या प्रकाराने नाशिकरोड परिसरामध्ये खळबळ उडाली आहे. किशोर भारती असे खंडणीची मागणी करणार्या संशयिताचे नाव आहे. प्रमोद बाळकृष्ण गोरे (रा. शिखरेवाडी, नाशिकरोड) या बांधकाम व्यावसायिकाच्या फिर्यादीनुसार, त्यांची मालधक्का परिसरामध्ये नवीन बांधकाम साईटचे काम सुरू आहे. (latest marathi news)

रविवारी (ता. २१) सकाळी ते बांधकाम साईटच्या ऑफिसमध्ये बसलेले असताना संशयित किशोर भारती त्याठिकाणी आला. त्याने, इमारतीतील फ्लॅट विकायचे असतील तर आम्हाला १० लाख रुपयांची खंडणी द्यावी लागेल अशी धमकी दिली. त्यानंतर संशयित भारती पुन्हा सायंकाळी कार्यालयात आला आणि पुन्हा खंडणीची धमकी देत, खंडणी दिली नाही तर बांधकाम साईट बंद पाडण्याची धमकी देत शिवीगाळ केली.

या घटनेमुळे बांधकाम व्यावसायिक गोरे यांनी नाशिकरोड पोलीस ठाणे गाठले आणि तक्रार दिली. त्यानुसार, संशयिताविरोधात खंडणीचा गुन्हा दाखल करण्यात आला असून, उपनिरीक्षक बिडकर हे तपास करीत आहेत. मात्र या घटनेमुळे नाशिकरोड परिसरातील बांधकाम व्यावसायिकांमध्ये भितीचे वातावरण आहे.