नाशिक : पंचवटीतील पेठरोडवरील लक्ष्मणनगर येथे पोलिसात तक्रार केल्याच्या कारणावरून संशयितांच्या जमावाने राडा घातला. या संशयितांच्या टोळक्याने केलेल्या कोयत्याच्या हल्ल्यात एक जण जखमी झाला आहे. याप्रकरणी पंचवटी पोलिसात जीवघेणा हल्ला केल्याप्रकरणी ७-८ जणांविरोधात गुन्हा दाखल केला असून, पोलिसांनी चौघांना अटक केली आहे. (Crime Fatal attack after reporting to police in Panchavati )

उदय सुनील चारोस्कर ( २०, रा. लक्ष्मणनगर, भगरे गल्ली, पेठरोड), अंकुश उर्फ पब्या अरुण गायकवाड, बाबू यादव, योगेश प्रकाश यंदे (१९, रा. पालिका बाजार, पेठरोड), राहुल शिवाजी शिंदे (१९, रा. लक्ष्मणनगर, भोरे गल्ली), खेमकुमार अजय यादव (१९, रा. तेलंगवाडी, पेठरोड) यासह दोन अज्ञात संशयित अशी गुन्हा दाखल संशयितांची नावे असून, उदय, योगेश, राहुल, खेमकुमार या चौघांना अटक करण्यात आली आहे.

किरण सुभाष जाधव (रा. राहुलवाडी, पेठरोड) यांच्या फिर्यादीनुसार, रविवारी (ता. ४) रात्री साडेआठ वाजेच्या सुमारास जाधव हे विजय कराटे यास भेटण्यासाठी लक्ष्मणनगरमध्ये गेले होते. त्यावेळी मुख्य संशयित उदय चारोस्कर याने संशयितांसह जमावाने येत कराटे यांना, तू माझ्याविरोधात पंचवटी पोलीसात तक्रार का दिली, असे विचारून शिवीगाळ करीत मारहाण सुरू केली. सदरचा वाद सोडविण्यासाठी फिर्यादीसह गौरव रोकडे, आकाश वाक्‌चौरे हे गेले असता संशयितांनी त्यांनाही मारहाण व शिवीगाळ केली.

तसेच, जीवे ठार मारण्याच्याच उद्ेदशाने संशयिताने त्याच्याकडील कोयत्याने जाधव यांच्या डोक्यात मारून गंभीर दुखापत केली. त्यानंतर संशयित पसार झाले. याप्रकरणी पंचवटी पोलिसात संशयितांविरोधात दंगलीसह जीवघेणा हल्ला केल्याप्रकरणी गुन्हा दाखल केला आहे. याप्रकरणी पंचवटी पोलिसांनी मुख्य संशयित चारोस्कर याच्यासह चौघांना सोमवारी (ता. ५) अटक केली आहे. तर तिघा जखमींवर उपचार सुरू आहेत. गुन्हयाचा तपास सहायक निरीक्षक रायकर हे करीत आहेत.