नाशिक : पेट्रोलपंप सुरु करण्यासाठी परवानगी मिळवून देण्याची बतावणी करत किराणा व्‍यापाऱ्याची भामट्यांनी तब्‍बल ४६ लाख ४४ हजार रुपयांची फसवणूक केल्‍याचा प्रकार उघडकीस आला आहे. वेगवेगळ्या बँक खात्‍यांमध्ये पैसे जमा करूनही संबंधितांकडून प्रतिसाद मिळत नसल्‍याने आपली फसवणूक झाल्‍याचे व्‍यापाऱ्याच्या लक्षात आल्याने सायबर पोलिस ठाण्यात फिर्याद दिल्‍यानंतर हे प्रकरण समोर आले आहे. (Nashik fraud cyber crime under name of petrol pump marathi news)

सायबर पोलिस ठाण्यात किराणा व्‍यापारी असलेल्‍या संतोष चंद्रकांत कटारे (वय ४७, रा. गोसावीवाडी, नाशिकरोड) यांनी फिर्याद दिली आहे. या फिर्यादीत म्‍हटल्‍यानुसार, वेगवेगळी नावे सांगणाऱ्या अनोळखी व्‍यक्‍तींनी ईमेल, फोन आणि व्‍हॉट्‌सॲपद्वारे इंडियन ऑइल या कंपनीचे अधिकारी असल्‍याचे भासवीत त्‍यांना संपर्क केला.

तसेच इंडियन ऑइल कंपनीचे बनावट कागदपत्रे ई-मेलद्वारे पाठवून पेट्रोलपंप मिळवून देण्याचे आमिष त्‍यांना दाखविले. वेळोवेळी वेगवेगळ्या बँक खात्‍यांमध्ये पैसे जमा करण्यास सांगितले. त्‍यानुसार कटारे यांनी एकूण ४६ लाख ४४ हजार ६२५ रुपये बँक खात्‍यात जमा करूनही पंपाची मान्‍यता न मिळाल्‍याने फसवणूक झाल्‍याचे त्‍यांच्‍या निदर्शनात आले. (Latest Marathi News)

त्‍यांनी सायबर पोलिस ठाण्यात फिर्याद दिली. २३ जानेवारी ते ८ फेब्रुवारी या कालावधीत वेगवेगळ्या बँक खात्‍यांमध्ये ही रक्‍कम जमा केल्‍याचे फिर्यादीत म्‍हटले आहे. गेल्‍या काही कालावधीपासून भामट्यांकडून अशा प्रकारच्‍या फसवणुकी होत असून, नागरिकांनी सावध राहण्याचे आवाहन सायबर पोलिस ठाण्याकडून करण्यात आले आहे.