Nashik Crime News : महिलेच्या गळ्यातील सोन्याची पोत ओरबाडून नेणाऱ्या दोघा संशयित सोनसाखळी चोरांना इंदिरानगर पोलिसांनी अटक केली. बुधवारी (ता.३१) रात्री साडेआठ ते नऊच्या सुमारास इंदिरानगर परिसरातील रथचक्र चौकात हा सर्व प्रकार घडला. परवेझ मणियार, निशांत हांडोरे अशी अटक केलेल्या संशयितांची नावे आहे. बुधवारी रात्री साडेआठच्या सुमारास रथचक्र चौकात इंदिरानगर पोलिस ठाण्याच्या एका पथकाकडून स्टॉप ॲण्ड सर्च ऑपरेशन राबविले जात होते. (Gold chain thieves arrested with help of local youth)

याच दरम्यान येथील स्थानिक युवकांना परिसरात दुचाकीवर दोन युवक हे संशयास्पद फिरत असल्याचे आढळून आले. त्यांनी तत्काळ इंदिरानगर पोलिस ठाण्यात माहिती दिली. ठाण्यातील अधिकारी परिसरात असलेल्या पथकाला याबाबत सांगितले. पथकातील अधिकारी यांना देखील परिसरातील फिरत असलेल्या या दोघांवर संशय होताच. याच दरम्यान दोघे संशयित हे रथचक्र चौक येथील मागच्या बाजूस असलेल्या बाप्पा चौकात येताच त्यांनी एका महिलेच्या गळ्यातील सोनसाखळी ओढून पलायन करण्याचा प्रयत्न केला.

यावेळी स्थानिक तरुणांनी दुचाकीवरुन या संशयित सोनसाखळी चोरट्यांच्या दुचाकीला धक्का देत पाडले. यावेळी पाठीमागून आलेल्या पोलिस पथकाने तत्काळ या दोघा संशयित चोरट्यांना ताब्यात घेतले. याप्रकरणी महिलेच्या तक्रारीवरुन इंदिरानगर पोलिस ठाण्यात रात्री उशिरा उशिरापर्यंत सदर गुन्हा दाखल करण्याचे काम सुरू होते. दोघा संशयित यांना अटक केल्याने शहरातील सोनसाखळी चोरीचे आणखी गुन्ह्यांची उकल होणार असल्याची असल्याची माहिती इंदिरानगर पोलिस ठाण्याचे वरिष्ठ पोलिस निरीक्षक अशोक शरमाळे यांनी दिली.