पेठ : तालुक्यातील गोळसपाडा जंगलातील कुंपन क्रमांक ९६ मधील जंगलातील मौल्यवान खैराच्या लाकडाची कत्तल करून कार (एमएच ४८, एडब्ल्यू २०५३)मधून चोरटी वाहतूक करीत असताना, शुक्रवारी (ता. १५) पहाटे सुमारे चारच्या दरम्यान वन विभागाच्या गस्ती पथकाला आढळून आली. वाहनचालकासह वाहन व खैर प्रजातीचे ४१ नग ००.३८५ घनमीटर माल जप्त केला असून, चालकास अटक केली आहे. (Nashik Crime Illegal transportation of Khair wood marathi news)

झरी आंबे परिसरातील जंगलात मोठ्या प्रमाणात चोरटी वृक्षतोड सुरू असून, येथील वनपरिक्षेत्र अधिकाऱ्यांना ती रोखण्यात अपयश येत आहे. याच अधिकाऱ्याच्या कार्यळात झरी जंगलातील खैर लाकूड तस्करांनी दिवसाढवळ्या मशीनच्या सहाय्याने कत्तल करून नेली.

तरीही यावर वरिष्ठांनी कोणतीच ठोस कारवाई केली नाही. वरिष्ठ अधिकाऱ्यांच्या वरदहस्ताने तस्करी होत आहेत की काय, अशी चर्चा होत आहे. लाकूड चोरीत वन विभागच्याच लोकांचा सहभाग असल्याची लोकांत दबक्या आवाजात चर्चा होत आहे. आतापर्यंत जप्तीच्या कारवाया फक्त माहितीच्या आधारवर झाल्या आहेत. (latest marathi news)

केलेल्या कारवाईत आरोपी मिळत नाहीत. एकतर जाणूनबुजून सोडून देतात. नाही तर आरोपी अंधाराचा फायदा घेऊन फरारी झाल्याचे दाखवतात, हे स्वत:हून कधीच लाकूड तस्करी थोपविण्याचे काम करत नसून साप निघून गेल्यावर हे जमीन बडवण्याचे काम करीत असतात. माध्यमांनाही माहिती देताना टाळाटाळ केली जाते किंवा खरी माहिती दडवली जाते. तालुक्यातील वन विभागाचे संपूर्ण अधिकारी कर्मचारी बदलण्याची मागणी नागरिकांतून होत आहे.