कळवण : शहरातील बसस्थानक परिसरात सोनसाखळी चोरट्यांचा सुळसुळाट झाला असून, चोरट्यांनी ज्येष्ठ महिला, शालेय व महाविद्यालयीन मुलींना लक्ष्य केले आहे. दिवसांआड सोनसाखळ्या चोरीचे प्रमाण वाढले असून, बसस्थानक जणू सोनसाखळी चोरांचा अड्डाच बनले आहे. चोरट्यांचा तत्काळ बंदोबस्त करावा, अशी मागणी प्रवासांनी केली आहे. (Nashik Crime Kalavan bus station gold chain thieves marathi news)

कळवण आदिवासीबहुल तालुका आहे. बहुतांशी नागरीक बसने प्रवास करतात. बसमध्ये प्रवासी चढ-उतार करीत असताना गर्दी होते. या गर्दीचा फायदा घेऊन चोरटे ज्येष्ठ महिला व महाविद्यालयीन मुलींच्या सोन्याच्या दागिन्यांवर डल्ला मारतात.

घटनेनंतर संपूर्ण बसची तपासणी करुनही पोलिसांना चोरटे सापडत नाही. पोलिस ठाण्यात तक्रार करुनही उपयोग होत नाही. परिणामी, पोलिसांच्या कार्यपद्धतीवर प्रश्‍नचिन्ह उपस्थित होत आहे. शहरातही बंद घरांना लक्ष्य केले जात असून, भरदिवसा धाडसी चोऱ्या झाल्या आहेत. (Latest Marathi News)

लोकप्रतिनिधींच्या निवेदनाला केराची टोपली

मेनरोडवरील वाहतूक कोंडी व बस स्थानकातील चोऱ्यांबाबत युवक काँग्रेसचे जिल्हाध्यक्ष शैलेश पवार यांच्यासह विविध राजकीय पक्ष, संघटना व पदाधिकाऱ्यांनी कळवण पोलिसांना कायमस्वरुपी पोलिस कर्मचारी नेमणूक करण्याचे निवेदन दिले आहे. असे असताना दिवसभरात एकदोन तासच पोलिस आढळून येतात. बऱ्‍याचदा पोलिस बसस्थानकात येतात. होमगार्डसोबत सेल्फी घेऊन वरिष्ठांना पाठवतात. यापलिकडे काही होत नाही.

पोलिस चौकी नावालाच

बसस्थानक परिसराच्या मुख्य प्रवेशद्वारावर तात्पुरत्या स्वरूपात पोलिस चौकी आहे. मात्र, या चौकीत पोलिस कर्मचारीच राहत नसल्याने सदर चौकी शोभेचे बाहुले बनली आहे.