Nashik Crime News : पेठ तालुक्यात फॉरेस्ट डेव्हलपमेंट कॉर्प. ऑफ महाराष्ट्रच्या राखीव वनक्षेत्रात आंबा, झरी वनपरिक्षेत्रातील वनाधिकारी गस्त करून वनसंरक्षणाची कामे करत असताना मिळालेल्या गुप्त माहितीच्या आधारे खैरची अवैध वाहतूक करताना खैर लाकूड जप्त करण्यात आले. संबंधित कारवाईमध्ये मुद्देमाल जप्त करण्यात आला असून, संशयितांचा शोध सुरू आहे. आंबा झरी वनपरिक्षेत्रातील कक्ष क्रमांक ८१ आंबा बिटामधून काही जण अवैधरीत्या खैर झाडांची तोड करून वाहतूक करत असल्याची माहिती मिळाली. ( Khair seized in forest department action )

वनाधिकाऱ्यांनी शेपूझरी पार नदीत सापळा रचून अवैधरीत्या खैर झाडाची तोड करून घेऊन जात असताना टेम्पोचा पाठलाग केला. परंतु अंधाराचा फायदा घेत संशयित आरोपी नवसू लोहार (रा. चिखलीची खोरी, टोकरपाडा, ता. कपराडा, जि. बलसाड) व इतर दोन व्यक्ती पसार झाले. टाटा टेम्पो (डीजे १५, एक्स ४८३१) व खैर नग दहा (अंदाजे चार लाखांचा मुद्देमाल) जप्त करण्यात आले आहे. भारतीय वन अधिनियम व पोटकलमनुसार गुन्हा नोंद करण्यात आला.

संबंधित कारवाईत नाशिक वन प्रकल्प विभागातील वनपरिक्षेत्र अधिकारी ए. आर. अजेस्त्र, बी. डी. शेवाळे, वनपाल सी. जे. चौरे, वनरक्षक नवीद सय्यद, कुंदन राठोड, डी. यू. शिंगटे, एम. व्ही. विसपुते, एम. जी. वाघ, सी. एम. पवार, प्रादेशिक वनविभाग वनरक्षक तुषार भोये, वसंत गावित, हेमराज गावित, तुळशीराम खांडवी, भास्कर पवार व पुढील गुन्हे कामाचे तपास नाशिक वन प्रकल्प विभागाचे विभागीय अधिकारी डॉ. एस. एन. नेवसे व सहाय्यक व्यवस्थापक डी. पी. परदेशी यांच्या मार्गदर्शनाखाली सुरू आहे.