Nashik Bribe Crime : त्र्यंबकेश्वर तालुक्यातील मौजे अंजनेरी येथील ४० गुंठे जागेची मोजणी व हद्द कायम करण्यासाठी ३५ हजार रुपयांची लाच स्वीकारताना प्रभारी भू-करमापकाला लाचलुचपत प्रतिबंधक विभागाच्या पथकाने रंगहाथ अटक केली आहे.

याप्रकरणी मुंबई नाका पोलिसात गुन्हा दाखल करण्यात आला असून, न्यायालयाने लाचखोरास आज न्यायालयीन कोठडी सुनावल्याने त्याची नाशिकरोड मध्यवर्ती कारागृहात रवानगी केली. (Crime Land Surveyor of Trimbak arrested for taking bribe)

सचिन भाऊसाहेब काठे (३७, रा. रिव्हीर राईन नेस्ट, दसक, जेलरोड) असे लाचखोर भू-करमापकाचे नाव आहे. ४९ वर्षीय तक्रारदाराच्या तक्रारीनुसार, भूमिअभिलेख कार्यालयाच्या त्र्यंबकेश्वर येथील उपअधीक्षक भूमिअभिलेक कार्यालयाकडे त्यांनी मौजे अंजनेरी येथील सर्वे नं. १९९/ब मधील ४० गुंठे क्षेत्राची मोजणी आणि हद्द कायम करण्यासाठी अर्ज केला होता.

यासंदर्भातील या कार्यालयातील वर्ग-३चे कर्मचारी व भू-करमापक लाचखोर काठे याने मंगळवारी (ता. २५) तक्रारदाराकडे ४० हजारांच्या लाचेची मागणी केली होती. याबाबत तक्रारदाराने लाचलुचपत प्रतिबंधक विभागाकडे तक्रार केली असता, विभागाने या तक्रारीची पडताळणी केली. (latest marathi news)

त्यानुसार लाचलुचपत प्रतिबंधक विभागाच्या पथकाने गोविंदनगर परिसरात बुधवारी (ता. २६) रात्री तडजोडी अंती ३५ हजारांची लाच स्वीकारताना लाचखोर काठे यास दबा धरून असलेल्या पथकाने रंगेहाथ अटक केली. याप्रकरणी मुंबई नाका पोलिसात गुन्हा दाखल करण्यात आला आहे.

सदरची कारवाई लाचलुचपत प्रतिबंधक विभागाच्या अधीक्षक शर्मिष्ठा वालावलकर-घारगे, अपर अधीक्षक माधव रेड्डी, उपअधीक्षक नरेंद्र पवार यांच्या मार्गदर्शनाखाली पोलीस निरीक्षक स्वप्नील राजपूत, हवालदार प्रभाकर गवळी, संदिप हांडगे, किरण धुळे, सुरेश चव्हाण, संतोष गांगुर्डे आदींनी केली.