नाशिक/मालेगाव : राष्ट्रीय गुप्तचर यंत्रणेने (एनआयए) दहशतवादविरोधी पथकाच्या (एटीएस) मदतीने मालेगावात शनिवारी (ता. ५) पहाटे छापा टाकून एका होमिओपॅथी डॉक्टरसह तिघांना ताब्यात घेतले आहे. ‘जैश-ए-मोहम्मद’ या दहशतवादी संघटनेला फंडिंग केल्याच्या संशयावरून सदर कारवाई करण्यात आली.

दरम्यान, ‘एनआयए’ने देशभरातील पाच राज्यांतील २२ ठिकाणी छापे टाकून संशयितांना ताब्यात घेतले आहे. तर, महाराष्ट्रात जालना आणि छत्रपती संभाजीनगरमध्येही छापे टाकून कारवाई करण्यात आली. दरम्यान, मालेगाव येथे छाप्यावेळी पोलिस बंदोबस्त तैनात करण्यात आला होता. (NIA ATS raid in Malegaon)

राजस्थानातील आठ रेल्वेस्थानके उडवून देण्याची धमकी काही दिवसांपूर्वी देण्यात आली होती. यासंदर्भात ‘एनआयए’कडून तपास सुरू असताना त्यात जैश-ए-मोहम्मद या संघटनेचा हात असल्याचे समोर आले होते. याच प्रकरणावरून देशभरात २२ ठिकाणी शनिवारी पहाटे छापे टाकून संशयितांना ताब्यात घेण्यात आले.

याच प्रकरणात काही दिवसांपासून ‘एनआयए’चे पथक मालेगावात ठाण मांडून तपास करीत असताना, शनिवारी पहाटे दोन ते तीनच्या दरम्यान मालेगावातील अब्दुलानगरमधील हॉमिओपॅथी डॉक्टरसह त्याच्याकडे काम करणारे दोन जण अशा तिघांना पथकाने ताब्यात घेतले. तिघांना त्यांच्या होमिओपॅथी क्लिनिकमध्ये नेऊन सुमारे सहा त सात तास चौकशी करण्यात आली. (latest marathi news)

क्लिनिकमधून काही संशयास्पद दस्तावेजही पथकाने ताब्यात घेतल्याचे समजते. रात्री उशिरापर्यंत ‘एआयए’- ‘एटीएस’ची कारवाई सुरू होती. दरम्यान, या कारवाईबाबत कमालीची गुप्तता पाळण्यात आली असून, पोलिसांनाही याची खबर लागू दिली नाही. यापूर्वीही गेल्या वर्षी ‘एटीएस’ने मालेगावातून ‘पीएफआय’शी संबंधित असलेल्यांना अटक केली होती.