Nashik Crime News : रेल्वे स्थानकात प्रवासी सोबत ओळख निर्माण करून त्यांना गुंगीचे औषध देऊन लूटमार करणाऱ्या चोरट्यास रेल्वे सुरक्षा बल व लोहमार्ग पोलिसांनी संयुक्त कारवाई करीत शिताफीने अटक केली. माळेगाव (ता. सिन्नर) येथील बुद्धिसागर कुशियाल बैगा (वय २०) हा तरुण सतना (राज्य. मध्यप्रदेश) येथे जाण्यासाठी रेल्वे तिकीट काढण्यासाठी आला होतो. यावेळी छत्रपती संभाजी महाराज नगर येथील मेहबूब चांद शेख (वय ४८) याने त्याच्या सोबत मैत्री करीत चहा घेण्याचा आग्रह केला. ( thief who looted by giving stupor drug was arrested )

चहा घेतल्या नंतर त्याने स्वतः जवळील गुंगीचे औषध टाकून आणलेले क्रीमचे बिस्कीट खाऊ घातले व फलाट क्रमांक एकवर आणून बसवले. थोड्यावेळाने बुद्धिसागर यास गुंगी आल्यानंतर संशयित मेहबूब याने त्याच्याजवळ असलेले १५५० रुपये, पाकीट, आधारकार्ड, पॅन कार्ड व मोबाईल असा एकूण १९ हजार ५५० रुपये किंमतचा ऐवज लुटून पोबारा केला. बुद्धिसागर बेशुद्ध अवस्थेत आढळल्याने त्यास पोलिसांनी बिटको रुग्णालयात दाखल केले.

त्याला शुद्ध आल्यावर त्याने अज्ञात व्यक्तीच्याविरोधात लोहमार्ग पोलिस ठाण्यात फिर्याद दाखल केली. त्यानंतर लोहमार्ग पोलिस ठाण्याचे पोलिस निरीक्षक महेश कुलकर्णी, रेल्वे सुरक्षा बलाचे निरीक्षक हरफुलसिंग यादव यांच्या मार्गदर्शनाखाली पोलिस उपनिरीक्षक अशोक आहिरे, सहाय्यक पोलिस उपनिरीक्षक संतोष उफाडे-पाटील, दीपक निकम, शैलेंद्र पाटील, रेल्वे सुरक्षा बलाचे दिनेश यादव, मनीष कुमार, निर्मला सूर्यवंशी आदींनी गुप्त माहितीच्या आधारे संयुक्त कारवाई करीत चोरी गेलेल्या रोख रक्कम व ऐवजासह मेहबूब शेख यास अटक केली.