अभोणा : गेल्या काही आठवड्यांपासून वाढत्या उष्णतेच्या लाटेचा विपरीत परिणाम येथील परिसरात मोठ्याप्रमाणावर जाणवू लागला आहे. कळवण तालुक्यातील बार्डे, दह्याणे, गोसराणे, कळमथे, जयपूर, भगूर्डी, ओझर, मोहमुख, चणकापूर, दत्तनगर आदी परिसरात मिरची, टोमॅटो, कलिंगड व कोबीचे पीक या तीव्र उष्णतेमुळे धोक्यात आले आहे. (Crops are affected by increasing summer temperature in Abhona)

जवळपास चाळीस ते एक्केचाळीस डिग्री सेल्सिअस इतके सर्वाधिक तापमान परिसरात जाणवत आहे. टोमॅटो, मिरची व कोबीसाठी लाखो रुपये खर्च करून प्रचंड उष्णतेमुळे पिकांवर विविध रोगांचा प्रादुर्भाव मोठ्याप्रमाणात वाढला आहे. या रोगांमुळे लांब मिरचीचे वाण जागेवरच वळून आखूड झाले आहे.

शिवाय पहिला खोडा हाच शेवटचा तोडा ठरल्याने, मिरचीचे पीक सोडून द्यावे लागत आहे. टोमॅटोच्या बाबतीतही वाढत्या उष्णतेमुळे झाड सुकल्याने फुलगळ होत नाही, परिणामी टोमॅटोचे उत्पादन थांबते. (latest marathi news)

इतर तालुक्यात दुष्काळी परिस्थिती असूनही कळवण तालुका पश्चिमपट्ट्यात अजूनही पुरेसे पाणी आहे. मात्र उष्णता इतक्या मोठ्या प्रमाणात वाढल्याने पिकांमध्ये योग्य अन्न घटक तयार होण्यास अडचणी येत आहेत.

"मिरचीच्या प्लॉटसाठी शेत तयार करण्यापासून रोप, रासायनिक खते, फवारण्या यांसाठी एकरी दीड लाख रुपये खर्च करूनही, उष्णतेच्या लाटेमुळे मला मिरचीचे पीक सोडावे लागले. मिरची तोडणीसाठी लागलेल्या मजुरी इतकेही पैसे मिळाले नाही. पहिला खोडा हाच शेवटचा तोडा निघतोय. पाच एकर क्षेत्रातील मिरची व टोमॅटोची हीच परिस्थिती आहे. पुरेसे पाणी असूनही वातावरण व तीव्र उष्णतेमुळे माझे मोठे आर्थिक नुकसान झाले आहे." - अविनाश वाघ, शेतकरी, बार्डे (ता.कळवण)