PM Crop Insurance Yojana : प्रधानमंत्री पीकविमा योजना २०२४-२५ या वर्षात बीड पॅटर्न (८०:११०) या तत्त्वावर राबविली जाणार आहे. त्या अनुषंगाने खरिपासाठी एक रुपयात प्रधानमंत्री पीकविमा योजनेत सहभागी होता येणार आहे. अर्ज भरण्याची अंतिम मुदत १५ जुलै २०२४ पर्यंत आहे. जास्तीत जास्त शेतकरीबांधवांनी सहभागी व्हावे, असे आवाहन तालुका कृषी अधिकारी प्रशांत रहाणे यांनी केले आहे. ( Deadline till Monday for payment of PM crop insurance yojana )

या योजनेंतर्गत विमा कंपनीवर नुकसानभरपाईचे विमा हप्त्याच्या ११० टक्क्यांपर्यंत दायित्व राहणार असून, यापेक्षा नुकसानभरपाई विमा हप्त्याच्या ८० टक्क्यांपेक्षा कमी असल्यास विमा कंपनी एकूण २० टक्के रक्कम स्वत:कडे नफा म्हणून ठेवेल व उर्वरित रक्कम राज्य शासनास परत करेल. (latest marathi news)

या योजनेत खरीप हंगामातील भातशेती, ज्वारी, बाजरी, नाचणी, भुईमूग, सोयाबीन, खुरासणी, मूग, उडीद, तूर, मका, कांदा, कापूस या पिकांचा समावेश आहे. प्रधानमंत्री पीकविमा योजना ओरिएंटल इन्शुरन्स कंपनी लिमिटेड यांच्या मार्फत राबविली जाणार आहे. पीकविमा भरणे व अधिक माहितीसाठी कृषी सहाय्यक, कृषी पर्यवेक्षक, मंडळ कृषी अधिकारी, तसेच नजीकच्या सेवा केंद्राशी संपर्क साधावा, असे आवाहन करण्यात आले आहे.