Nashik E-Bus : आद्य स्वयंभू शक्तिपीठ असलेल्या श्रीक्षेत्र सप्तशृंगगडावर दर्शनासाठी जाणाऱ्या भाविकांसाठी महाराष्ट्र राज्य परिवहन महामंडळाच्या नाशिक आगाराने सुरु केलेल्या पर्यावरणपूरक वातानुकुलीत ई-बस सेवा सुरु केल्याने भाविकांचा प्रवास आणखी सुखकर व उन्हाच्या चटक्यात गारेगार प्रवास करता येत आहे. ई-बसला भाविक व मार्गावरील प्रवाशांचा चांगला प्रतिसाद लाभला आहे. ()

भाविकांचे श्रद्धास्थान व उत्तर महाराष्ट्राचे कुलदैवत असलेल्या श्रीक्षेत्र सप्तशृंगगडावर एसटी महामंडळाच्या माध्यमातून १ एप्रिलपासून ईलेक्ट्रीक बस भाविकांच्या सेवेत दाखल झाल्या असून, गडावरील ग्रामस्थांच्या उपस्थितीत फटाक्यांच्या आतिषबाजीत मोठ्या उत्साहात पहिल्या बसचे स्वागत करण्यात आले.

सप्तशृंगगडावरील सामाजिक कार्यकर्ते संदीप बेनके व व्यापारी संघटनेचे अध्यक्ष अजय दुबे यांच्या हस्ते बससमोर नारळ वाढविण्यात आले. तसेच, पहिल्या वातानुकूलित एसटी बसचे चालक दिनेश जायभावे व वाहक ज्योती अरिंगळे यांना श्रीफळ व चुनरी देऊन ग्रामस्थांच्या वतीने सत्कार करण्यात आला.

यावेळी राजू शिंदे, अभिषेक दुबे, मनोज पाठक, हितेश दुबे, इमरान शहा, मोंटी दुबे, नवनाथ आहिरे, सतीश जाधव, तुषार बर्डे, प्रकाश पाटील, निलेश कदम आदींसह ग्रामस्थ मोठ्या संख्येने उपस्थित होते.(latest marathi news)

आरामदायी बस

पर्यावरणपूरक बस प्रथमच सप्तशृंगी गडावर आल्याने ग्रामस्थांच्या व भाविकांच्या चेहऱ्यावरील कुतूहलमिश्रीत आनंद यावेळी पाहायला मिळाला. यावेळी ‘सप्तशृंगी माते की जय, जय मातादी’च्या घोषणा देण्यात आल्या. वातानुकूलित, आरामदायी ईलेक्ट्रीक बससेवा सुरू झाल्याने भाविकांमध्ये या बसमधून प्रवास करण्यासाठी मोठ्या प्रमाणात प्रतिसाद दिसून येत आहे.

असे आहे वेळापत्रक

नाशिक जुन्या बसस्थानकावरून (सीबीएस) वातानुकुलीत पहिली ई-बस सकाळी पाच वाजता सुटेल. तर दुसरी बस ५.३० वाजता सुटेल. दोन्ही बस दोन तासानंतर सप्तशृंगगडावर पोहचल्यानंतर अर्ध्या तासानंतर म्हणजेच ७.३० आणि ८ वाजता परतीच्या प्रवासाला निघतील. नाशिक येथे आल्यानंतर बॅटरी चार्ज करुन या दोन्ही बस पुन्हा ११.३० आणि १२ वाजता गडाकडे प्रस्थान करतील.

संध्याकाळी ६ आणि ६.३० वाजता पुन्हा या बस गडाकडे प्रस्थान करतील. बस मध्ये एकूण ३४ प्रवाशी आसन व्यवस्था आहे. लालपरीचे साधारण भाडे १२० रुपये आहे. तर ई-बसचे १७० रुपये आहे. या बस प्रवासामध्ये ५ ते १० वर्षांच्या मुलांना आणि महिलांना तिकिटामध्ये ५० टक्के सवलत असणार आहे. तर ७५ वर्षावरील प्रवाशांना मोफत प्रवास असणार आहे.