सुदर्शन सारडा : सकाळ वृत्तसेवा

ओझर : दिंडोरी लोकसभा मतदार संघात दीड महिन्यांपासून सुरू असलेले लोकसभा निवडणुकीचे घमासान आज (ता.१९) सायंकाळी शमणार आहे. यंदाच्या निवडणुकीत महायुती आणि महाविकास आघाडीत निर्माण झालेली चुरस पाहता हा सामना कमालीचा फिरल्याने दोन्ही गटांनी कुठेही प्रचारात कुठलीच कसर सोडली नाही. (Dindori Lok Sabha Constituency)

त्यामुळेच केंद्रीय राज्यमंत्री भारती पवार यांच्या समोर भास्कर भगरे यांनी कडवे आव्हान उभे करून लढतीत समान टक्कर आणली आहे. त्यामुळे आता गुरुजींसमोर ताईंना राजकीय खिचडी शिजवण्याचे आव्हान आहे. महायुतीच्या उमेदवारांसाठी बुधवारी (ता.१५) पंतप्रधान नरेंद्र मोदींची सभा झाली त्याच्या काही तासांनी शरद पवार यांनी सभा घेत हम भी कुछ कम नही चा संदेश दिला.

दिंडोरी हा शेती बेल्ट असल्याने येथील व्यापारी पेठा या स्थानिक शेतकऱ्यांच्या उत्पन्नावर फुलणाऱ्या असतात. त्यामुळेच गत पाच वर्षात शेतकऱ्यांची कशी हेळसांड होऊन शेतमालाला भाव दिला नसल्याचा ठपका महविकास आघाडीच्या नेत्यांनी लोकांसमोर मांडला. तर पाच वर्ष त्यावर बेस तयार करून त्याचा परिणाम येणाऱ्या काळात दिसेल असे सांगत महायुती मतांचा जोगवा मागत आहे. (latest marathi news)

कांद्याभोवती फिरली निवडणूक

ज्या कांद्याने यापूर्वीही सत्तेच्या खुर्च्यांना सुरुंग लावले तोच कांदा यंदा तापला आहे. भारती पवार यांनीही त्यास अनेक ठिकाणी सामोरे जात गल्ली दिल्लीतला फरक समजावून सांगितला. तरी देखील आरोग्य यंत्रणा आणि सुविधा याबाबत त्यांना सपशेल उत्तर देता आले नाही. दुसरीकडे भगरे यांनी नेमके मुद्दे हेरत पूर्ण मतदार संघ पिंजून काढत लोकांनाच प्रश्न विचारून आपलेसे करण्याचा प्रयत्न केला.

आमदार एकीकडे कार्यकर्ते दुसरीकडे

दिंडोरी कार्यक्षेत्रातील काही आमदारांचे कार्यकर्ते रोजीरोटीमुळे सत्ताधाऱ्यांच्या विरोधात असल्याचे चित्र आहे. अनेक जवळच्या लोकांचे म्हणणे एकच आहे. आमदारकीच्या वेळेस पाहू यंदा आम्हाला आमच्या पद्धतीने काम करू द्या. या पवित्र्यामुळे आमदारही लोकसभा आणि विधानसभा या दोन्हींचा कल बघता सांभाळून घेण्याच्या मानसिकतेत आहे.