Nashik News : लोकसभा निवडणुकीपाठोपाठ झालेल्या विधान परिषदेच्या शिक्षक मतदारसंघाची आचारसंहिता संपताच पालकमंत्री दादा भुसे यांनी रविवारी (ता. ७) दुपारी तीनला जिल्हाधिकारी कार्यालयात जिल्हा नियोजन समितीची बैठक आयोजित केली आहे. लोकसभा निवडणुकीत नाशिक व दिंडोरी लोकसभेत महाविकास आघाडीच्या उमेदवारांचा विजय झाला. (District Planning Committee meeting on Sunday)

नवनिर्वाचित खासदारांची रविवारी पहिलीच बैठक असणार आहे. जिल्हा नियोजन समितीला जिल्हा वार्षिक योजनेतून जूनमध्ये ३३ टक्के निधी प्राप्त झाला आहे. सर्वसाधारण योजनांसाठी ८१३ कोटींपैकी २७० कोटी रुपये प्राप्त झाले आहेत.

त्यादृष्टीने जिल्हा नियोजन समितीने जूनच्या पहिल्या आठवड्यात जिल्हा परिषद व इतर प्रादेशिक कार्यान्वयीन यंत्रणांना नियतव्यय कळविला आहे. जिल्हा परिषद व इतर विभागांना जिल्हा वार्षिक योजनेतून सर्वसाधारण योजना, अनुसूचित जमाती घटक योजना व अनुसूचित जाती घटक योजनांसाठी निधी दिला जातो. (latest marathi news)

त्यात सर्वसाधारण योजनेसाठी ८१३ कोटी रुपये, आदिवासी विकास विभागाच्या जिल्हा वार्षिक योजनेतून अनुसूचित जमाती घटक योजनेसाठी ३४९ कोटी व अनुसूचित जाती घटक योजनेसाठी शंभर कोटी रुपये नियतव्यय कळविला आहे.

त्यानुसार विभागांचे नियोजन सुरू झाले आहे. पालकमंत्री दादा भुसे यांनी रविवारी जिल्हा नियोजन समितीची बैठक बोलवल्याने आचारसंहितेमुळे कामांना लागलेला ब्रेक आता निघणार आहे.