Dr. Babasaheb Ambedkar Jayanti : आकर्षक विद्युत रोषणाईने सजविलेले चित्ररथ, आबालवृद्धांनी संपूर्ण मार्गावर केलेली गर्दी, जयभीम घोषणा व ढोल ताशांचा गजर आणि फटाक्यांची आतषबाजी करत निघालेल्या मिरवणुकीने भीमसैनिकांमध्ये मोठ्या प्रमाणात उत्साह संचारला होता. शहरातील मुख्य मिरवणुकीत विविध सतरा मंडळांच्या चित्ररथांनी सहभाग नोंदविला. राज्याचे अन्न व नागरी पुरवठा मंत्री छगन भुजबळ, आमदार प्रा. देवयानी फरांदे यांच्या हस्ते उद्‌घाटन झाल्यावर सायंकाळी सहाला मिरवणुकीस प्रारंभ झाला. (nashik Dr Babasaheb Ambedkar Jayanti celebration in city )

ढोल ताशे, डीजेच्या आवाजात व भीमगीतांच्या तालावर ठेका धरलेल्या तरुणाईने मिरवणुकीस शोभा वाढविली. मिरवणुकीत भीमशक्ती मित्रमंडळ, राहुल मित्रमंडळ, सम्राट मित्रमंडळ, धम्म जागृती सांस्कृतिक युवा मंच, बुद्ध संदेश मित्रमंडळ आदी मंडळाच्या १७ चित्ररथांनी सहभाग नोंदविला.

या वेळी जयंती उत्सव समितीचे अध्यक्ष अध्यक्ष अक्षय साळवे, आयोजन समितीचे माजी नगरसेवक संजय साबळे, दिलीप साळवे, रोहन दाणी, दीपक डोके, अविनाश शिंदे, योगेश तेजाळे, विशाल जाधव सहभागी झाले होते. मिरवणुकीत सहभागी गौतम बुद्धांचा जिवंत देखावा लक्षवेधी ठरला. पोलिसांनी चोख बंदोबस्त ठेवला. (latest marathi news)

नाशिक रोड भागात अभूतपूर्व उत्साह

नाशिक रोड, उपनगर, जेलरोड, देवळालीगाव, विहीतगाव, चेहेडी, सिन्नर फाटा, शिंदे, पळसे, एकलहरे, सामनगाव परिसरातून पंचवीसच्या वर चित्ररथ निघालेले होते. मिरवणुक मार्गावर फटाक्यांची आतषबाजी करण्यात आली. काही मंडळांनी डॉ. बाबासाहेब आंबेडकर यांच्या जीवनावर आधारित देखावे सादर केली होती.

एकनिष्ठ फ्रेंड सर्कल, जेल रोड युवा सोशल फाउंडेशन, साहेब युवा सोशल फाउंडेशन, अश्विनी कॉलनी मिलन, एकलहरे सार्वजनिक भीमोत्सव समिती, वाय. पी. फ्रेंड सर्कल, सम्राट, शिवरत्न, सार्वजनिक सांस्कृतिक कला व क्रिडा, मिलन, सामनगाव राजवाडा, त्रिशरण, शिखरेवाडी, पंचशील तरुण, पंचशील कॉलनी, आतषबाजी, आम्रपाली अचानक, प्रबुद्ध, संविधान फाउंडेशन, सिध्दार्थ सम्राट त्यागमाता रमाई महिला व गौतमनगर फ्रेंड सर्कल, निर्मिक सोशल फाउंडेशन, उपनगर फ्रेंड सर्कल या मंडळांनी मिरवणुकीत सहभाग घेतला.