नाशिक : महाराष्ट्र लोकसेवा आयोगातर्फे घेतलेल्‍या राज्‍य सेवा (मुख्य) परीक्षा २०२३ ची सर्वसाधारण गुणवत्तायादी गुरुवारी (ता. २६) जाहीर केली आहे. या यादीत ८९६ उमेदवारांच्‍या नावांचा समावेश आहे. आयोगातर्फे फेब्रुवारी २०२३ मध्ये पूर्व परीक्षेसंदर्भात सूचनापत्र जारी केले होते. यानंतर निर्धारित वेळापत्रकानुसार पूर्व परीक्षा पार पाडताना मुख्य परीक्षेसाठी पात्रताधारक उमेदवारांची निवड करण्यात आली होती. (General Merit List of Civil Service Main Exam Announced )

नोव्‍हेंबर २०२३ मध्ये मुख्य परीक्षेचे परिपत्रक जारी केले होते. नुकतीच वेगवेगळ्या टप्प्‍यांमध्ये मुलाखतीची प्रक्रिया पार पाडल्‍यानंतर आयोगाने गुरुवारी सर्वसाधारण गुणवत्तायादी प्रसिद्ध केली आहे. ही यादी तात्‍पुरत्‍या स्‍वरूपाची असून, अर्जामधील विविध दाव्‍यांच्‍या अनुषंगाने अंतिम निकालापूर्वी प्रमाणपत्रे, कागदपत्रे पडताळणी करताना काही उमेदवारांच्‍या दाव्‍यांमध्ये बदल होऊ शकतो, असेही आयोगाने स्‍पष्ट केले आहे. एका उमेदवाराचा निकाल प्रशासकीय कारणास्‍तव राखून ठेवलेला आहे. सर्वसाधारण गुणवत्तायादी विविध न्‍यायालयात व न्‍यायाधिकरणात दाखल न्‍यायिक प्रकरणांवरील अंतिम निर्णयाच्‍या अधीन असेल, असेही आयोगाने स्‍पष्ट केले आहे. (latest marathi news)

पसंतीक्रमाची सुविधा लवकरच

या भरती प्रक्रियेत उपजिल्‍हाधिकारीपदासाठी नऊ पदे, राज्‍यकर सहाय्यक आयुक्‍त गट ‘अ’साठी १२, उपमुख्य कार्यकारी अधिकारी/गटविकास अधिकारी गट ‘अ’ ३६ पदे, वित्त व लेखा सेवा विभागातील सहाय्यक संचालक ४१ पदे, सहाय्यक कामगार आयुक्‍त दोन यांसह इतर विविध पदांचा समावेश होता. सर्वसाधारण गुणवत्तायादी जाहीर केली असली तरी वैद्यकीय अहवाल विचारात घेऊन उमेदवारांना लवकरच पदांचे पसंतीक्रम ऑनलाइन स्‍वरूपात सादर करण्याची सुविधा उपलब्‍ध केली जाणार असल्‍याचे आयोगाने स्‍पष्ट केले आहे.