नाशिक : गेल्या कित्येक दिवसांपासून नाशिक लोकसभा मतदारसंघासाठी उमेदवाराची घोषणा भिजत पडलेले असताना, आजअखेर त्यावर सकारात्मक तोडगा निघाला असल्याचे सूतोवाच खुद्द पालकमंत्री दादा भुसे यांनी केले आहे. नाशिक शिवसेनेकडेच राहील, असा दावा करीत, काही वेळातच मुख्यमंत्री नाशिकसाठी शिवसेनेचा उमेदवार घोषित करणार असल्याचे पालकमंत्री भुसे यांनी सांगितले. ( Nashik Lok Sabha Constituency to Shiv Sena )

महाराष्ट्र दिनानिमित्त पोलीस कवायत मैदानावर ध्वजारोहण केल्यानंतर पालकमंत्री भुसे माध्यमांशी बोलत होते. पालकमंत्री भुसे म्हणाले, महाराष्ट्र दिनाला नाशिककरांना गोड बातमी मिळेल. नाशिक मतदारसंघ हा शिवसेनेचा बालेकिल्ला राहिला आहे. म्हणून नाशिकसाठी आग्रही होतो. त्यानुसार नाशिक शिवसेनेचेच आहे. काही वेळातच मुख्यमंत्री एकनाथराव शिंदे हे नाशिकचा उमेदवार जाहीर करतील. संध्याकाळपर्यंत शिवसेनेचा उमेदवार मतदारापर्यंत पोहोचलेला असेल, असेही पालकमंत्री म्हणाले.

भुजबळ आमचे नेते

मंत्री छगन भुजबळ हे आमचे नेते आहेत. त्यांच्याच नेतृत्वाखाली आम्ही नाशिकची निवडणूक लढू आणि जिंकूही. पंतप्रधान मोदी यांच्यासाठी आम्ही सर्व एकदिलाने काम करू असेही पालकमंत्री म्हणाले.(Nashik Political News)

शांतिगिरी महाराजांशी चर्चा नाही

लोकशाहीमध्ये कोणालाही फॉर्म भरण्याचा हक्क आहे. त्यानुसार ते फॉर्म भरतील.पण पक्षाचा एबी फार्म महत्वाचा असतो. त्यामुळे आमचा उमेदवाराच शिवसेनेचा असेल. उमेदवारी वा निवडणुकीबाबत स्वामी शांतिगिरी महाराज यांच्याशी कोणतीही चर्चा नाही. त्यांच्याशी भेटही नसल्याचे पालकमंत्री भुसे म्हणाले.

आम्ही सोबतच

13 खासदार आणि सर्व आमदार मुख्यमंत्री एकनाथराव शिंदे यांच्या सोबतच आहोत. राज्याच्या विकासासाठी आम्ही पंतप्रधान मोदी यांच्यासोबत आहोत असेही पालकमंत्री म्हणाले.