Nashik News : इगतपुरी तालुक्यात सलग आठ दिवसांपासून संततधारेसह मुसळधार कोसळत असून, त्यात पावसाचा जोर अधिकच वाढल्याने विक्रमी पावसाची नोंद झाली आहे. जोरदार पावसामुळे शुक्रवारी (ता. २६) पुन्हा दारणा, वाकी, भाम या नद्या अधिक जोराने प्रवाहित झाल्याने सर्वत्र पाणीच पाणी दिसून येत आहे. इगतपुरी तालुक्यात २४ तासांत पुन्हा विक्रमी ९३ मिलिमीटर पावसाची नोंद झाली. (Heavy rain continues in Igatpuri taluka)

घोटी, इगतपुरीत सर्वाधिक पाऊस झाला असून, दोन्ही शहरांचे जनजीवन पूर्णपणे विस्कळित झाले आहे. सलग होणाऱ्या मुसळधारेमुळे भावली व भाम धरण १०० टक्के भरले असून, दारणा धरणांसह तालुक्यातील धरणांमध्ये साठा वेगाने वाढत आहे. इगतपुरी तालुक्याच्या पश्‍चिम पट्ट्यात झालेल्या अतिवृष्टीमुळे सर्वच भात शेतामध्ये शुक्रवारी तलावाचे स्वरूप प्राप्त झाल्याचे दिसून येत आहे.

पूर्व भागात झालेल्या जास्त पावसामुळे भातलागवडीच्या कामांना ‘ब्रेक’ लागला आहे. दारणा, भाम व वाकी या नद्या या मोसमात सलग सहा-सात दिवसांपासून दुथडी वाहत आहेत. इगतपुरी, घोटी, मानवेढे, वैतरणा, धारगाव, टाकेद या भागात मोठ्या प्रमाणात पाऊस झाला. (latest marathi news)

या भागात आठ दिवसांपासून पावसाचे सातत्य कायम राहिले आहे. मात्र रात्रभराचा पाऊस हा अतिवृष्टीसदृश होता. त्यामुळे जनजीवन विस्कळित झाले आहे.

दरम्यान, घोटी, इगतपुरी व परिसरात मुसळधार पाऊस झाला असून, संततधारेमुळे शहरी तसेच ग्रामीण भागात पूर्णपणे जनजीवन विस्कळित झाले आहे. हा पाऊस रात्रीपासून आज उशिरापर्यंत सुरूच राहिल्याने याचा थेट परिणाम जनजीवनावर झाला.