अंबासन, (जि.नाशिक) : करंजाडी खो-यात सायंकाळी सहाच्या सुमारास वीजेच्या कडकडाटसह वादळी वारा व पावसाने जोरदार हजेरी लावली. वादळात अनेक घरांचे पत्रे उडाल्याने मोठ्या प्रमाणात नुकसान झाले आहे तर रस्त्यावर झाडे उन्मळून पडल्याने वाहतूकही ठप्प झाली आहे. शेतातील कांदा उत्पादक शेतकऱ्यांच्या चाळीचे पत्रे उडाल्याने साठवलेला कांदा भिजून पडला आहे. वादळाचा तडाखा वीजेच्या खांबानांही बसला असून बरेचशे जमीनदोस्त झाले आहेत.  (Nashik Heavy rain with force winds in Karanjade Valley)

पावसाळ्यातील पहिल्याच दिवशी करंजाडी खोऱ्यात वादळी वाऱ्यासह पावसाने धडक दिली. करंजाड (ता.बागलाण) येथे वादळामुळे अनेक घरांचे पत्रे उडाल्याने संसार उघडय़ावर पडला आहे. गावातील केदा कृष्णा देवरे यांच्या घराशेजारीच दावणीला बांधलेल्या शेळ्यावर भिंत कोसळल्याने मृत पावल्या आहेत.

वादळात उडालेले पत्रे अक्षरशः रस्त्यावर पडलेले दिसून येत होते. कांद्याला भाव मिळेल या भाबड्या आशेने शेतकऱ्यांनी शेतातील कांदा साठवणूक केलेल्या चाळीचे पत्रे उडाल्याने कांदा भिजून पडला आहे यामुळे कांदा उत्पादक शेतकऱ्यांचे मोठ्या प्रमाणात नुकसान झाले आहे.

दरम्यान वीज वितरण कंपनीचे खांबही जमीनदोस्त झाल्याने वीजपुरवठा खंडित झाला आहे. पोलिस पाटील प्रविण देवरे, सामाजिक कार्यकर्ते केवळ देवरे व इतर तरूणांनी मदतकार्य सुरू केले मात्र नुकसान मोठ्या प्रमाणात असल्याने अडचण निर्माण होत होती. वादळात रस्त्यावर अनेक झाडे उन्मळून पडल्याने करंजाडहून निताणे, पारनेर, बिजोटे, आनंदपुर, आखतवाडे, आसखेडा, नामपूर या गावांचा संपर्क तुटला असून रस्त्यावरील वाहतूक ठप्प झाली आहे. (latest marathi news)

रस्त्याच्या कडेला असलेली मोठी झाडे संबधित विभागाने पावसापूर्वी तोडणे आवश्यक असतांनाही नाहक वाहनचालकांना मनस्ताप सहन करावा लागत आहे. याकडे संबधित विभागाने लक्ष घालावे अशी मागणी वाहनचालकांकडून होत आहे तसेच नुकसान झालेल्या घरांचे व कांदा चाळीचे पंचनामा करून नुकसान भरपाई देण्यात यावी अशी मागणी करंजाड येथील नागरिकांनी केली आहे.

अन् डोळ्यात अश्रूधारा 

...वादळी वाऱ्यात झालेल्या नुकसानीचे चित्र पाहताच कष्टकरी कांदा उत्पादक शेतकऱ्यांचे डोळे पाणावले होते. भर उन्हाळ्यात तोकड्या पाण्यावर मोठ्या कष्टाने पिकवलेला कांदा पावसात भिजला, वादळात चाळीचे पत्रे उडाले तर मोठ्या कांदा चाळी जमीनदोस्त झाल्या साठवलेला कांदाचा चिखल झाला. दाद मागणार कुणाकडे अशा हताशपणे भिजलेल्या कांद्याकडे बघत होते तर बऱ्याशा घरांचे पत्रे उडाल्याने संसार उघडय़ावर पडले आहेत.