नाशिक : गोहरण (ता. चांदवड) येथील बेकायदेशीरपणे सुरू असलेला खडी क्रशर प्लांट ‘सील’ करण्याचे आदेश जिल्हाधिकाऱ्यांनी देऊनही रात्रभर चालविला जात आहे. याविषयीचे व्हिडिओ समोर आल्यावर जिल्हाधिकारी जलज शर्मा यांनी पुन्हा चौकशीचे आदेश दिले आहेत. (Nashik illegal gravel crusher plant at Goharan Chandwad being run all night news)

गोहरण ग्रामपंचायतीच्या हद्दीतील नितीन गुंजाळ, सचिन अग्रवाल व नितीन आहेर यांच्या नावावर असलेल्या गट क्रमांक २१८/३ मध्ये उत्खनन करण्यात आले. याविषयी थेट जिल्हाधिकारी शर्मा यांच्याकडे तक्रार प्राप्त झाल्यावर त्यांनी चांदवडचे तहसीलदार मंदार कुलकर्णी यांना कारवाई करण्याचे आदेश दिले.

तहसीलदारांनी येथील खडी क्रशरची पाहणी करीत ते ‘सील’ केले आहे. पण, ही कारवाई निव्वळ फार्स ठरली असून, काही दिवसांत खडी क्रशर प्लांट रात्री अकराला सुरू होतो आणि पहाटे पाचपर्यंत चालविला जातो. त्यामुळे परिसरातील नागरिकांनी याविषयी व्हिडिओ तयार करून कारवाई करण्याचे आवाहन केले आहे.  (latest marathi news)

कारवाई निव्वळ फार्स

तहसीलदारांनी खडी क्रशर ‘सील’ करताना मशिनची चाके ‘सील’ करणे अपेक्षित आहे. पण, इलेक्ट्रिक बोर्ड ‘सील’ करून कारवाई केल्याचे अधिकाऱ्यांनी भासविले. प्रत्यक्षात दुसरीकडून वीजजोडणी घेऊन सर्रासपणे हे क्रशर चालविले जात आहे. त्यामुळे अगोदर झालेली कारवाई ही निव्वळ फार्स ठरली का, असा प्रश्‍न उपस्थित होतो.